Herson vilâyetiniñ azat etilgen topraqlarınıñ sakinlerine qışnı Ukrayınanıñ diger regionlarında keçirmek kerek, dep bildirdi vilâyetniñ arbiy memuriyet yolbaşçısı Yaroslav Yanuşeviç sentâbrniñ 19-nda.
«Azat etilgen topraqlarnıñ vaziyetine emiyet berip, qışqa Zakarpattâ, Hmelnıtskıy ve Jıtomır vilâyetine tahliye olmağa tevsiye etemiz. Hususan balalı ve az areket etken insanları olğan qorantalar aqqında aytıla», – dep yazdı Yanuşeviç Telegram kanalında.
O, vilâyet akimiyetiniñ sıcaq ağına muracaat etip, tahliye olmağa istegenini bildirmege tevsiye etti.
«Vilâyetniñ arbiy memuriyetine muracaat etip, gumanitar ihtiyaclarıñıznı bildiriñiz. Vaqtınca köçken şahıs statusını alğan soñ devlet büyükler içün 2000 ğrıvnâ, saqat insanlar ve balalar içün 3000 ğrıvnâ maddiy yardım töleycek», – dep qoştı Yanuşeviç.
Sentâbrniñ 12-nde «Yug» operativ komandanlığı soñki vaqıtları Ukrayına Silâlı quvetleri Herson vilâyetinde beş mesken yerni işğalden azat etti, dep bildirdi: Vısokopillâ, Novovoznesenske, Biloğirka, Suhıy Stavok ve Mırolübivka. «Yug» komandanlığınıñ Ukrayına arbiyleri umumen 13 mesken yer azat etildi, dep bildirdi.
Ukrayına arbiyleri aman-aman bütün Herson vilâyetinde ateş kontrolini pekitti, dep bildirdi.
Rusiye Mudafaa nazirligi Ukrayına Silâlı quvetleriniñ cenüpteki qarşı ücümini tanıdı, lâkin «büyük ğayıplar» sebebinden «olmadı», dep bildirdi. Qırımnıñ Rusiye yolbaşçısı Sergey Aksenov Ukrayına Silâlı quvetleriniñ ücümini «yalan haber» dep adlandırdı.
Sentâbrniñ 19-nda Amerika Cenkni tedqiq etüv institutı (ISW) bildirgenine köre, Herson vilâyetindeki Ukrayına qarşı ücümi ileriley, Rusiye ordusınıñ onı yavaşlatmağa ve mudafaa içün kelişken yerge çekilmege tırışqanına oşay.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
