İyülniñ 11-nde Rusiye işğal etken Herson vilâyetiniñ Geniçesk rayonındaki Rıkovo köyünde 54 yaşında qırımtatarı Alim Velilâyev tutuldı, dep haber ete Qırımtatar resurs merkezi.
Rusiye uquq qoruyıcıları onı Rusiye Federatsiyası Ceza kodeksiniñ 208-inci maddesine «Qanunsız silâlı birleşmeni quruv ya da onıñ erkânında iştirak etüv» istinaden qabaatlay.
«FSB, 2015-2016 seneleri o, Ukrayınada faaliyet köstergen, Rusiyede ise yasaqlanğan qanunsız silâlı birleşmeniñ iştirakçisi edi, dep bildire. Qayd etilgenine köre, er kişi «Çonğar» keçiş noqtasında qaravullıq yapıp, Qırım Cumhuriyetiniñ sakinlerine mal ketirgen naqliyat vastalarını blok etken edi», – dep bildire Qırımtatar resurs merkezi.
Merkezniñ malümatına köre, Alim Velilâyev apiske alındı.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün:https://d1ug5n8f9xpr1h.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
