Ukraina Milliy politsiyası Çerniğiv vilâyetinde yüz bergen yol qazası sebebinden cinaiy dava açılğanını bildirdi. Yol qazasında üç kişi elâk oldı, 16 insan yaralandı. Yolda Herson-Moskva avtobusı ve yük maşinası çatıştılar.
«Dekabrniñ 16-nda aqşam Kopti-Gluhov-Baçevsk yolunda Sırbistan vatandaşı aydağan Iveco yük maşinası ve dümen başında Ukraina vatandaşı olğan «Herson-Moskva» seferli «Neoplan» avtobusı çatıştılar… İlk malümatqa köre, avtobus aydavcısı maşinanı ozğanda qarşı yolaqqa çıqıp, anda yük maşinasınen çatıştı. Çatışuv vaqtında yük maşinasınıñ tirkemesinden kâğıtlar tüşti ve keçken maşinağa zarar ketirdi», – dep bildirdi politsiyanıñ haberinde.
Milliy politsiyanıñ malümatına köre, avtobus aydavcısı ve eki yolcu qaza yerinde elâk oldı, 16 kişiniñ çeşit yaraları bar. Yaralanğanlar arasında – ekinci aydavcı ve avtobus yolcuları, yük maşinasınıñ aydavcısı ve «Toyota» maşinasınıñ yolcuları.
«Uquq qoruyıcılar 8 aylıq balası olğan ana içün vaqtınca yer berdi, avtobus yolcuları arasında bir bala bar edi. Bu aqta balalı qadınnı qabul etken politsiya hadimleri yaqın köyniñ sakinlerinen añlaştı», – dep bildirdi politsiya.
Cinaiy dava «yol areketiniñ telükesizligi ya da bir qaç insannıñ ölümine sebep olğan naqliyatnı qullanuv qaideleriniñ bozulmasına» dair maddege istinaden açıldı.
