Rusiye ordusı Hersonnıñ Dniprovskıy rayonında "İskra dobra" cemaat teşkilâtınıñ maşinasına ücüm etti, dep bildirdi şeerniñ arbiy memuriyet yolbaşçısı Yaroslav Şanko mayısnıñ 15-nde.
"Göñülliler cemiyet sakinlerine daima yardım ete, sıcaq aşnen temin ete", – dep bildirdi o.
Şanko qayd etkenine köre, ücüm gumanitar yardım berilgen noqtalardan birineye aş ketirilgende oldı:
"İlk malümatqa köre, yaralanğanlardan biri ağır alda buluna – erkekniñ ayağı kesilecek. Digeriniñ ezigi bar".
Şeerniñ arbiy memuriyet yolbaşçısı qayd etkenine köre, Rusiye ordusı vilâyet merkeziniñ Dniprovskıy rayonında World Central Kitchen halqara gumanitar teşkilâtınıñ maşinasına dronnen ücüm etti. Maşina aydavcısı yaralanmadı.
"Rusiye arbiyleri kene adiy vatandaşlarğa ve cebedeki Hersonda barışıqsever ealige yardım etken insanlarğa ücüm ete. Bu tesaduf degil, barışıqsever sakinler ve er kün insanlarnı qorçalağan ve cemiyetke qoltutqanlarğa qarşı bir terror", – dedi Şanko.
Rusiye arbiyleri Ukrayina regionlarına çeşit silâ qullanıp muntazam surette ücüm ete.
Rusiye akimiyeti, Rusiye ordusı Ukrayinanıñ şeer ve köyleriniñ grajdan infrastrukturalarına, hastahaneler, mektepler, bala bağçaları, energetika ve suv teminlevi obyektlerine ücüm etkenini red ete.
Ukrayina akimiyeti ve halqara teşkilâtlar bu darbelerni Rusiye Federatsiyasınıñ arbiy cinayetleri olaraq tanıdı ve olarnıñ maqsatlı olğanını qayd ete.