Eki yıl evelsi Hersondan çekilgen Rusiye işğalci akimiyeti üç yaşına qadar 48 balanı hırsızladı, dep yazdı Ukrayina prezidenti Volodımır Zelenskıy dekabrniñ 24-nde Telegram kanalında.
Onıñ aytqanına köre, bu balalarnıñ çoqusı zornen işğal etilgen topraqnıñ terenliklerine – işğal etilgen Qırımğa köçürildi, qalğanlarını ise Rusiyege sürgün ettiler.
«Ukrayin balaları oyuncaq degil, amma, körüne ki, Rusiye zenginleri ve memurları içün öyle ola. Bu balalarnıñ er biri artında ğayıp olmamaq kerek olğan ömür bar. Yoq olmamaq kerek olğan taqdir. Ukrayin balaları evlerine qaytsınlar dep, elimizden kelgenini yapmaq kerekmiz», – dep aytıla haberde.
Ukrayinanıñ resmiy malümatına köre, cenk vaqtında 20 biñden ziyade ukrayin balası Rusiyede ve işğal etilgen topraqlarda qaldı. Ukrayina Yuqarı Radanıñ insan aqları vekâletlisi Dmıtro Lubinets umumen Rusiye Ukrayinadan 150 biñge yaqın balanı qanunsız çıqarğanını tahmin etti. Yuqarı Radanıñ bala aqları vekâletlisi Darya Ğerasımçuk bu raqamnı «bir qaç yüz biñ bala, yani 200-300 biñ ola» dep ayta.
Noyabrniñ 12-ne qadar Ukrayina Rusiye Federatsiyasından ve vaqtınca işğal etilgen topraqlardan 1002 balanı qaytarıp oldı, dep bildirdi Lubinets.
Herson uruşları 2022 senesi fevral ayında Rusiyeniñ Ukrayinağa qarşı büyük ücüminden soñ başlandı ve aynı şu yılı noyabr ayında şeerniñ işğalden azat etilmesinen yekünlendi.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://d3454ggyqnys2v.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
