Kreml nezaretindeki Qırım akimiyeti, Rusiye yarımadanıilhaq etkeniniñ 5 yıllığı bayramınıñ tedbirleri ilân etildi. Bu aqta Qırım akimiyeti saytında haber etile.
Vesiqağa köre, bu künge bağışlanğan hatıralıq kapik darp etilecek.
Qırım akimiyeti, yır ve bediiy yarışlarnı keçirmege buyurdı, bundan ğayrı, eki ay devamında (2019 sensi yanvar-fevral) 2014 senesi “referendumı” aqqında film çıqarılacaq.
Bundan ğayrı, emirde, mart 16 ve 18-inde Qırım cemaat naqliyatında yürüşni bedava yapmağa niyetlengenleri bildirile.
Qırım ve Aqyar şeeri territoriyasında 2014 senesi martnıñ 16-sında yarımadanıñ statusı boyunca dünya tarafından tanılmağan referendum ötkerildi. Rusiye, onıñ neticesine esaslanıp, Qırımnı öz toprağına qoştı. Ne Ukraina, ne Avropa Birligi, ne de AQŞ referendumdaki rey berüvniñ neticelerini tanımadılar. Rusiye prezidentiVladimir Putin martnıñ 18-nde Qırımnıñ Rusiyege «qoşulğanını» ilân etti.
Halqara teşkilâtlar, Qırımnıñ işğali ve ilhaqını qanunsız tanıp, Rusiyeniñ areketlerini takbih ettiler. Ğarp devletleri bir sıra iqtisadiy sanktsiyalarnı qullandı. Rusiye, yarımadanı işğal etkenini inkâr etip, buña «tarihiy adaletniñ tiklenmesi», dey. Ukrainanıñ Yuqarı Radası 2014 senesi fevralniñ 20-ni, Rusiye tarafından Qırım ve Aqyarnıñ muvaqqat işğali başlağan künü olaraq resmen ilân etti.
