Karantinniñ devam etmesi Pasha qutlamalarından soñ Ukrainada hastalarnıñ sayısı tez artıp artmaycağına bağlıdır. Bu aqta Sağlıq naziriniñ muavini Viktor Lâşko Azatlıq Radiosınıñ yayınında ayttı.
Onıñ bildirgenine köre, yañı hastalarnıñ sayısı umumiy hasta sayısından 2%-dan çoq artsa, karantin tedbirleri uzatılacaq, çünki sağlıq sisteması becerememesi mümkün.
«Kelecek çarşenbege doğru, Pashadan soñ, karantinniñ uzatıluvı aqqında laf etecekmiz. Pasha bayramlarında ne olacaq ve insanlar karantin tedbirlerine nasıl riayet etecek, buña baqacaqmız. Karantinden çıquv stsenariylerini azırlaymız. Yımşatuv olacaq», – dep qayd etti Lâşko.
Viktor Lâşkonıñ aytqanına köre, Ukraina ihtiyacı olğan er kesniñ testini Dünya sağlıq teşkilâtınıñ talaplarına uyğun bir şekilde yapa. Künde 5 biñ test yapıla.
«Kütleviy test yapuvnı aytsaq, bir künde 40 million ukrainalınıñ testini yapıp olamamız. Hastalarnen alâqada olmağan ya da alâmetleri olmağan insanlarnıñ testini yapsaq, sahte telükesizlik fikri peyda olması mümkün. İnsan 3-4 inkubatsiya künü içinde test yaptırsa, sağlam olğanını is eter ve özüni izolâtsiya rejimini bozar», – dedi Lâşko.
Martnıñ 12-nde Ukrainada koronavirus yuqunçı qırğınlığınıñ telükesi sebebinden karantig başlandı, aprelniñ 3-ne qadar devam etecek edi, amma ükümet onı daa üç aftağa – aprelniñ 24-ne qadar uzattı.
Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.
O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.
2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.
