ABD prezident muavini, Demokratik firqadan prezident namzeti Kamala Harris, cumaaqşamı künü Ukrayina prezidenti Volodımır Zelenskıyge ABD strategik menfaatı olğan Ukrayinağa qol tutqanını bildirdi.
Bu aqta Harris Beyaz evde Ukrayina lideri ile körüşüvden soñ keçirilgen brifingde ayttı.
ABD prezident muavini qayd etti ki, Ukrayinanıñ suveren toprağınıñ büyük qısmından vazgeçüv teklifleri "barışıq teklifleri degil de, teslim olma teklifleridir". Harris, Ukrayinanıñ Rusiyege topraq bermek teklifi "telükeli ve qabul etilmez", dep qoştı.
O şunı da qayd etti ki, Rusiye prezidenti Vladimir Putin cenkni Ukrayina territoriyasından ordusını çıqarıp yekünley bile.
"Ukrayina halqı öz evlerini ve vatanını, serbestligini ve demokratiyasını vahşiy diktatorğa qarşı cesürliknen qorçalay", — dep ayttı Harris Beyaz evde.
Bundan da ğayrı, prezident namzeti Zelenskıyge Amerika Birleşken Devletleri cenkniñ bitmesi aqqında onıñ ğayesine qol tutqanını ayttı.
Sentâbrniñ 26-nda Volodımır Zelenskıy vitse-prezident Kamala Harris ile körüşti. Bundan evel o, ABD prezidenti Joe Biden ile laf etti.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d1ug5n8f9xpr1h.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
