Rusiyeniñ Harkivge raketa ücümi neticesinde 6 kişi elâk oldı, daa 16 yaralandı. Bunı Harkiv vilâyetiniñ arbiy memuriyetiniñ yolbaşçısı Oleg Sinegubov haber etti.
"Yazıq ki, amma Saltovkanıñ ateşke tutulması neticesinde elâk olğanlarnıñ sayısı arttı: 6 kişi öldi, 16 yaralandı", - dep yazdı o.
Ukrayina prezidenti Volodımır Zelenskıy Rusiye ordusınıñ raketası yataqhanege urğanını bildirdi.
"Harkivniñ Saltovkası aqqında eşitkende kene ağıra. Bütün Ukrayina içün ağıra. Harkiv içün ağıra. Raketa darbesi... Yataqhanege qarşı... Bina tamamınen yoq etilgen. Elâk olğan ve yaralanğanlarnıñ tam sayısı belli degil. Ealige qarşı alçaq, aşaa darbege bir mazeret tapılamaz, bu tecavuzcınıñ quvetsizligini köstere. Afu etmeycekmiz. İntiqam alacaqmız", - dedi Zelenskıy.
Harkiv ve vilâyetniñ meskün yerleri aman-aman er kün Ruiye tarafından ateşke tutula.
Rusiye fevralniñ 24-nde Ukrayinağa büyük istilâ etti, amma istegenini alamadı, hususan ukrainalılarnıñ tirenüvi sebebinden Kyivni zapt etemedi.
Aprelniñ 22-nde Rusiye Ukrayinadaki «mahsus operatsiyanıñ» (anda büyük istilânı böyle adlandıralar) «ekinci fazası» vaqtında yañı planlar aqqında bildirdi. Rusiye arbiyleri işğal etilgen Qırımğa qara ayatını temin etmek ve Pridnestrovyege çıqmaq içün Donbas ve cenübiy Ukrayinanı kontrol altına almağa niyetlene.
Faqat, ğarbiy istihbaratnıñ malümatına köre, Donbasta Rusiye muvafaqiyetli sıñırlı ve Ukrayinanıñ küçlü tirenüvi sebebinden Rusiye ordusınıñ ğayıpları büyük.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
