İyünniñ 22-nde kündüz Harkivge qarşı Rusiye darbesi neticesinde eñ az eki insan elâk oldı, dep bildirdi yerli akimiyet temsilcileri.
«Elâk olğan ve yaralanğanlar bar. Darbe mesken evge yapıldı», – dep yazdı şeer yolbaşçısı İgor Terehov.
«Acele yardım ekimleriniñ ilk malümatına köre, eki insan elâk oldı. Eñ az eki kişi yaralandı. İş devam ete», – dep qoştı Harkiv vilâyetiniñ arbiy memuriyet yolbaşçısı Oleg Sıneğubov.
Terehov yaralanğanlarnıñ sayısı 18 oldı, dep bildirdi.
«Suspilne» haber etkenine köre, elâk olğanlardan biri – darbe yerine yaqın duraqta insanlarnı tüşürgen troylleybus yolcusıdır.
Rusiye arbiyleri aman-aman er kün Harkiv ve vilâyetine ateş aça. Delil ve şaatlıqlarğa baqmadan, Moskva büyük istilâ başlağanından berli vatandaşlarğa qarşı ücümlerini inkâr ete.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://d1ug5n8f9xpr1h.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
