Oktâbrniñ 6-nda saba saatlarında yüz bergen Rusiye ücümi neticesinde bir bala öldi, dep bildirdi şeerniñ yolbaşçısı İgor Terehov.
"Balanı mesken evniñ dağıntıları astında taptılar. Yazıq ki, ölü. Ana-babasına ve yaqınlarına taziylerimni bildirem", - dep yazdı o.
Evel o, RF darbeler aselet sırf grajdanlıq infraterkibine endirgenini qayd etken edi.
Harkiv vilâyetiniñ arbiy memuriyetiniñ yolbaşçısı Oleg Sinegubov, saba Harkivde endirilgekn darbe neticesinde ekimlerge 16 adam yardım içün muracaat etkenini ve yaralanğanlar arasında 11 aylıq bala olğanını bildirdi. Onıñ malümatına köre, elâk olğan 11 yaşındaki bala eken.
Rusiye arbiyleri raketa, uçucısızları, topları yetken Ukrayina şeerlerine muntazam sürette ateş aça. Delillerge baqmadan, Rusiye vatandaş ve arbiylerge qarşı cenk cinayetleri alâqası olğanını inkâr ete.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d1ug5n8f9xpr1h.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
