Rusiye ordusı Harkivni "Uragan" çoqlu ateş raketa sisteması ile ateşke tuttı, neticede eki adam öldi, 19 yaralandı. Bunı Harkiv vilâyetiniñ arbiy memuriyetiniñ yolbaşçısı Oleg Sinegubov haber etti.
"Al-azırda Harkivniñ rayonlarından biriniñ Rusiyeniñ "Uragan" çoqlu ateş raketa sisteması ile ateşke tutulması neticesinde 19 yaralı aqqında belli, olarnıñ arasında bir bala bar. Yazıq ki, amma 4 adam ağır alda, 2 elâk oldı", - dep yazdı o Telegram kanalında.
Vilâyetniñ arbiy memuriyetiniñ yolbaşçısı, tecavuzcı yalıñız şeerniñ soqaqlarına, ticaret pavilyonlarına, yaşayış infraterkibine ateşke açqanını qayd etti.
O, Harkivniñ sakinlerini sığınaqlarda bulunmağa tekrar çağırdı.
Evel Harkiv şeer başı Rusiye ordusı şeerniñ ealisi sıq olğan rayonnı ateşke tutqanı aqqında bildirgen edi.
Rusiye fevralniñ 24-nde Ukrayinağa büyük istilâ etti, amma istegenini alamadı, hususan ukrayinalılarnıñ tirenüvi sebebinden Kıyivni zapt etemedi.
Aprelniñ 22-nde Rusiye Ukrayinadaki «mahsus operatsiyanıñ» (anda büyük istilânı böyle adlandıralar) «ekinci fazası» vaqtında yañı planlar aqqında bildirdi. Rusiye arbiyleri işğal etilgen Qırımğa qara ayatını temin etmek ve Pridnestrovyege çıqmaq içün Donbas ve cenübiy Ukrayinanı kontrol altına almağa niyetlene.
Faqat, ğarbiy istihbaratnıñ malümatına köre, Donbasta Rusiye muvafaqiyetli sıñırlı ve Ukrayinanıñ küçlü tirenüvi sebebinden Rusiye ordusınıñ ğayıpları büyük.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
