Harkivniñ vilâyet prokuraturası, cenk vaziyetinde devlet hainligi yapqan 48 yaşındaki Aluşta sakinine qarşı qabaatlav aktını mahkemege berdi. Bu aqta müessiseniñ telegram kanalında aytıla.
Qayd etilgenine köre, keçken sene noyabr ayında erkek Ukrayinağa qarşı cenkleşmege qarar aldı, bunıñ içün o Moskvağa yol aldı, anda dekabrniñ 1-nde Rusiye Federatsiyasınıñ Mudafaa nazirliginen bir yıl müddetine arbiy hızmetni keçmek içün añlaşma tizdiler.
Aluşta sakini Rusiyeniñ Kaliningrad şeerinde 7-nci gvardiya motoatıcı polkunıñ 06414 arbiy qısmına yollanıldı. O, işğal etilgen Lugansk vilâyetinde ateş ve taktik azırlıqtan keçti.
Müessisede qoştılar ki, iyün ayında qırımlı Rusiye Federatsiyasınıñ ücüm areketleri vaqtında Harkiv vilâyetiniñ Lipetsk cemiyetine avuştırıldı, mında onı ukrayin arbiyleri esir aldı.
"Qırımlı Harkiv vilâyetiniñ Harkiv rayon mahkemesinde mahkeme etilecek. Devlet hainligi içün oña on beş yıl ya da ömürlik apis cezası berilecek ve mal-mülkü müsadere etilecek", — dep aytıla haberde.
Ukrayina prezidentiniñ Qırım Muhtar Cumhuriyetindeki temsilcisi Tamila Taşeva bildirdi ki, "Qırımnıñ işğalden azat etilmesinden soñ Ukrayinanıñ esas vazifelerinden biri — yarımadanıñ Rusiye tarafından ilhaqına yardım etkenlerni tapmaq ve mesüliyetke çekmek olacaq". Onıñ aytqanına köre, insanlıqqa qarşı cinayetler ve arbiy cinayetler yapqanlar, insan aqlarını bozğanlar ve genotsid olaraq tanılğan cinayetlerni yapqanlar mesüliyetke çekilmeli.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d1ug5n8f9xpr1h.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
