Rusiye ordusı Harkiv vilâyetine kene ateş aça, eki insan elâk oldı, altı kişi yaralandı, vatandaş infrastrukturası zarar kördi. Bu aqta vilâyetniñ arbiy memuriyet yolbaşçısı Oleg Sinegubov bildirdi.
«Harkiv rayonında rusiyeliler vatandaş infrastrukturasına, qasaba soqaqlarına, meydan ve atta mezarlıqlarğa ateş aça. Darbe neticesinde meskün yerlerden birinde bina yıqıldı. İlk malümatqa köre, qurtulğan insanlarnıñ yaraları ciddiy degil, şunıñ içün hastahanege ihtiyacları yoq. Bugün Harkiv rayonında dört yaralanğan, bir ölü bar. Malümat teşkerile», – dep yazdı Sinegubov Telegramda.
Onıñ aytqanına köre, Rusiye arbiyleri Harkivniñ şarqiy rayonlarından birine ateş açtı, neticede bir insan can berdi, eki kişi yaralandı.
Sinegubov ava telüke işaretlerine emiyet bermege çağırdı.
BM, aprelniñ 26-na qadar Rusiyeniñ Ukrainağa qarşı büyük cenki neticesinde 2787 insannıñ ölümini ve 3152 barışıqsever vatandaş yaralanğanını tasdıqladı. Teşkilât kerçek raqamlar daa yüksek, dep qayd ete.
Rusiye bir sıra şaatlıqqa baqmadan, Ukrainada vatandaşlarğa qarşı ateş açqanını inkâr ete.
Ukrayinağa qarşı Rusiye silâlı ücümi fevralniñ 24-nden sabadan berli devam ete. Rusiye ordusı arbiy ve vatandaş infrastrukturasınıñ esas obyektlerine avadan darbe endire, uçaq alanları, arbiy bölük, cermay bazaları, yaqıt stantsiyaları, kilse, mektep ve hastahanelerni viran ete.
Aprelniñ başında Moskva Ukrayina şimalinde faal olğanını toqtattı, dep bildirdi. Tezden Ukrayina akimiyeti Kıyiv, Çerniğiv ve Sumı vilâyetinde Rusiye arbiyleri qalmadı, dep ayttı.
Rusiye ordusı çekilgen soñ azat etilgen köy ve şeerlerde kütleviy öldürüv adiseleri aqqında belli oldı. Bazı ğarbiy liderler Rusiyeni cenk cinayetlerinde qabaatladı. Rusiye akimiyeti arbiyleriniñ öldürüvlerge alâqası bar olğanını inkâr etip, olarnı «uyduruv» dep adlandıra.
Rusiye Ukrayinağa qarşı basqıncılıq cenk alıp barğanını inkâr ete ve bunı maqsadı «askeriysizleştirüv ve denatsifikatsiya» olğan «mahsus operatsiya» dep adlandıra.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d2ud65mnh9spru.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
