Rusiye Federatsiyasınıñ ordusı Harkivniñ meskün yerlerine kene ateş aça, soñki adiseden üç kişi can berdi, dep bildirdi Harkiv vilâyeti arbiy memuriyetiniñ reisi Oleg Sinegubov Telegramda.
Onıñ malümatına köre, daa yedi insan yaralandı, ekisiniñ alı ağır.
Acele tibbiy yardım taqımı quvetleştirilgen rejimde çalışa.
Ukraina Silâlı quvetleriniñ Baş ştabı malümatına köre, Slobojanske yönelişinde duşman ordusını quvetleştire, Harkiv şeeriniñ qısmiy qamaçavını devam ettire ve Ukraina bölükleri ve kritik infrastruktura obyektlerine ateş aça.
Ukrayinağa qarşı Rusiye silâlı ücümi fevralniñ 24-nden sabadan berli devam ete. Rusiye ordusı arbiy ve vatandaş infrastrukturasınıñ esas obyektlerine avadan darbe endire, uçaq alanları, arbiy bölük, cermay bazaları, yaqıt stantsiyaları, kilse, mektep ve hastahanelerni viran ete.
Aprelniñ başında Moskva Ukrayina şimalinde faal olğanını toqtattı, dep bildirdi. Tezden Ukrayina akimiyeti Kıyiv, Çerniğiv ve Sumı vilâyetinde Rusiye arbiyleri qalmadı, dep ayttı.
Rusiye ordusı çekilgen soñ azat etilgen köy ve şeerlerde kütleviy öldürüv adiseleri aqqında belli oldı. Bazı ğarbiy liderler Rusiyeni cenk cinayetlerinde qabaatladı. Rusiye akimiyeti arbiyleriniñ öldürüvlerge alâqası bar olğanını inkâr etip, olarnı «uyduruv» dep adlandıra.
Rusiye Ukrayinağa qarşı basqıncılıq cenk alıp barğanını inkâr ete ve bunı maqsadı «askeriysizleştirüv ve denatsifikatsiya» olğan «mahsus operatsiya» dep adlandıra.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d3f6698iwwkivl.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
