Rusiye arbiyleri Harkivniñ aman-aman bütün kritik infrastrukturasını yoq ettiler. Bunı LIGA.net saytına bergen intervyüsında şeer yolbaşçısı İgor Terehov bildirdi.
"Duşmannıñ planı ne olğanını bilmeyim. Energetik infrastruktura ve şahsiy energetik infrastruktura viran etildi. Rusiye bizni qorquzmağa istey, amma bu imkânsız. Eki yıl içinde Harkivniñ özünde DRG-den başlap farqlı telükelerni kördik. Bir vaqıtları eki millionlıq şeerden 300 biñ insan qalğan edi. Energetika saası ile vaziyet pek ağır", – dep ayttı şeer başı.
Rusiye arbiyleri sıñırdan bir qaç on kilometr mesafede bulunğan Harkivge aman-aman er kün ücüm ete. Mart ayında, Harkiv ve vilâyetiniñ eñ büyük energetik obyektlerine TES-5 ve Zmiyiv TES-ine ücüm etilgenini bildirdiler. Olar büyük zarar körgenini bildireler. Harkivde elektrik şimdi cedvelge köre berile.
Soñki künleri Rusiye arbiyleri şeerge 2022 senesinden berli ilk sefer idare etilgen avia bombalarını tüşürmege başladı, dep haber etile.
Şeer yolbaşçısınıñ aytqanına köre, şeerde, ateşke ve elektrik kesilüv telükesine baqmadan, 1,3 million insan qaldı, cenkten evel olğan sayıdan bir qaç yüz biñ az. Ne akimiyet, ne de arbiyler Harkivden tahliye etilmek kerek olğanını körmeyler. Terekovnıñ aytqanına köre, Rusiye tarafı "şeer sakinlerini qorquzmaq ve telâşlandırmaq içün" tahliye aqqında laflar tarqata. Şeer yolbaşçısı "şeerde telâş yoq", dep işandırdı.
Rusiye ordusı 2022 senesi fevral-mart aylarındaki keniş miqyaslı istilâsınıñ ilk künlerinde Harkivni almağa tırıştı. Soñra, cebeniñ sıñırı stabilleşti, 2022 senesi sentâbr ayında ise Rusiye orduları devlet sıñırından çetke çekildi. Soñki vaqıtları em Kremlge qoltutqan, em de mustaqil neşirler Rusiye arbiyleri Harkivge yañı ücüm azırlay bile, dep yaza.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
