Mayısnıñ 31-nde Harkivge qarşı darbe neticesinde elâk olğanlarnıñ sayısı arttı, dep bildirdi vilâyetniñ arbiy memuriyet yolbaşçısı Oleg Sinegubov.
«Harkivniñ Novobavarsk rayonına qarşı darbeler neticesinde elâk olğanlarnıñ sayısı 7-ge arttı, dört erkek ve üç qadın», – dep ayttı o.
Sinegubov bildirgenine köre, qıdıruv işleri devam ete, daa eki qadın yıqılğan bina altında qala bile.
Rusiye ordusı mayısnıñ 31-nde gece Harkivniñ Novobavarsk rayonına ücüm etti. İç işler nazirliginiñ malümatına köre, raketalardan biri beş qatlı evge tüşti, 3-ünci qattan 5-inci qatqa qadar yoq etildi, yanğın çıqtı.
Rusiye arbiyleri çeşit silâlardan Ukrayina regionlarına muntazam surette ücüm ete. Delillerge ve şaatlıqlarğa baqmadan, Moskva, tam bir istilâ başlağanından berli, vatandaşlarğa qarşı yapılğan ücümni red ete.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
