Rusiye arbiyleri mayısnıñ 6-na keçer gecesi Ukrayinağa uçucısızlarnen ücüm etti. Odesada bir insan elâk oldı, Harkivde eki kişi yaralandı, dep bildire yerli akimiyet.
«Rusiyeniñ Odsa rayonına qarşı darbesi neticesinde bir sıra vatandaş obyekti zarar kördi, mustaqil evler de bar. Bazı yerlerde yanğınlar çıqtı», – dep yaza Odesa vilâyetiniñ arbiy memuriyet yolbaşçısı Oleg Kiper.
Onıñ aytqanına köre, evlerden birinde elâk olğan insannıñ cesedi tapıldı.
Uçucısızlarnıñ Harkivge qarşı ücümi neticesinde şeerde 17 darbe qayd etildi, ilk malümatqa köre, eki insan yaralandı, dep bildire Harkiv şeer yolbaşçısı İgor Terehov.
Qurtarıcılar yaralanğan dört kişi aqqında bildire.
Onıñ aytqanına köre, ücüm eki saat devam etti, Harkivniñ bir qaç rayonı darbege oğradı: Şevçenko, Kyiv, Holodnoğorskıy ve İndustrialnıy. Harkivniñ merkeziy qısmında uçucısızlarnıñ darbesi neticesinde mustaqil ev yandı, dep ayttı Terehov. Bundan ğayrı, şeer yolbaşçısınıñ aytqanına köre, yanğın şeerniñ eñ balaban bazarlarından birinde çıqtı.
Monitoring kanalları Harkiv, Sumı, Çerniğiv ve Donetsk vilâyetlerinde uçucısızlar aqqında bildirdi. Ava telükesi Poltava, Dnipropetrovsk ve Zaporijjâ vilâyetlerinde ilân etildi.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d3454ggyqnys2v.cloudfront.net. Esas adise-vaqialarnı Qırım.Aqiqatnıñ Telegramve İnstagram saifelerinden taqip etiñiz.
