Harkiv civarında olğan uçaq qazasında 25 insan elâk oldı, eki kişi sağ qaldı, faqat ağır alda buluna. Bu aqta Baş prokurornıñ ofisi bildirdi.
Prokuratura Ukraina Ceza kodeksiniñ 416-ncı maddesine istinaden (qaza ya da ağır aqibetlerniñ sebebi olğan uçuş ve oña azırlıq qaideleriniñ bozuluvı) tahqiqat başlattı, dep haber ete Azatlıq Radiosı.
Harkiv vilâyetinde sentâbrniñ 26-sı uçaq qazasında elâk olğanlar içün matem künü dep ilân etildi.
İç işler nazirliginiñ bildirgenine köre, Ukraina silâlı quvetleri ava quvetleriniñ «An-26» uçağı sentâbrniñ 25-nde saat 20:50-de Harkiv vilâyetindeki Çuguyev yanında arbiy uçaq alanından eki kilometr uzaqlıqta tüşti. Silâlı quvetler uçaq qonacaq edi, dep bildirdi. Qurtarıcılarnıñ malümatına köre, uçaqta 28 insan bar edi. Ukraina silâlı quvetleriniñ Ava quvetleri uçaqta 27 insan bar edi, dep bildirdi – kursant Aleksandr Harçenko soñ daqqada uçuşqa alınmadı, uçaqta yoq edi.
Milliy telükesizlik ve mudafaa şurasınıñ kâtibi Oleksiy Danılovnıñ bildirgenine köre, bu talim uçuşı edi.
Harkiv vilâyetiniñ devlet memuriyet yolbaşçısı Oleksiy Kuçerniñ qayd etkenine köre, ilk malümatqa köre, «An-26» uçağınıñ uçucısı uçaq qazası ögüne sol köçürici çalışmağanını haber etti.
