Qırım Muhtar Cumhuriyetiniñ milletlerara munasebetler ve sürgün etilgen vatandaşlarnıñ işleri Cumhuriyet komitetiniñ sabıq reisi, qırımtatar faali ve mimar Edem Dudakov restavratorlarnıñ Bağçasaraydaki Hanlar sarayınıñ eski kirametini deñiştirmek planlarından qasevetlene. Onıñ fikirince, bu adım «medeniy mirasnı yoq etecek».
Bu aqta o, Qırım.Aqiqatqa ayttı.
Restavratorlarnıñ Hanlar sarayındaki baş korpusnıñ eski kirametini «eski pişirüv tehnologiyasına köre azırlanğan» yañı kirametke deñiştirmek niyeti aqqında akimiyetke qoltutqan «Millet» telekanalınıñ levhasında belli oldı.
«Men ve daa tecribeli mütehassıslar Türkiyeni örnek olaraq kösterip, teklif etken şeyge oşay. Biz yeterli olmağan kirametni qoşmağa teklif etken edi, onı 100% deñiştirmege kerekmey. Eski tehnologiyağa köre kirametni azırlasalar da, o, medeniy miras sayılmaycaq, çünki keçmiş ustalarınıñ işi degil, aynı mahsulnıñ azırlanmasıdır», — dedi Dudakov.
Onıñ aytqanına köre, yañıdan yapılğan kiramet artefakt olmaycaq.
«Tek 18-19-ıncı asırlarnıñ kirameti medeniy miras ola. Onı mümkün olğanı qadar saqlap qalmaq kerek. Bundan ğayrı, dağ köylerine ekspeditsiyalar yollap, ealiden eski kirametniñ satın alınmasını temin etmeli. Müzeyniñ eski müdirleri böyle yapqan edi», — dedi Dudakov.
Daa evel Kyiv Rusiye akimiyetiniñ Hanlar sarayında keçirgen «restavratsiyanı» çoq tenqit etken edi. Ukraina medeniyet nazirligi bu işler sebebinden Hanlar sarayınıñ baş korpusı yoq etile bile.
Bağçasaraydaki Hanlar sarayı – qırımtatarlarnıñ tarihınen bağlı eñ meşur müzey, Qırım hanları Geraylarnıñ yaz rezidentsiyasıdır. Müzey kompleksinde saray, garem, hanlar mezarlığı ve cami bar. O, UNESCO dünya mirasınıñ cedveline kirsetilecek namzetler sırasında mevcut.
