Bağçasaraydaki Han sarayınıñ binalarından biriniñ divarında keçirilgen «restavratsiya» vaqtında büyük çatlaq peyda oldı. Bu aqta akimiyetke qoltutqan «Krıminform» neşiri «Medeniyet saasınıñ müessiselerine hızmet etüv ve inkişaf ettirüv müdirligi» Rusiye devlet müessisesiniñ reberi İlya Alımçevniñ malümatına esaslanıp bildire.
«Bu saraynıñ maiyet binasıdır. Çatlağan divar – kopiyalanğan divardır. Binanıñ temelde turğanını köstergen leyhada hata bar, çünki qazıp başlağan soñ bu divarlar temelde turmağanını körgenler. Biraz qazğanlar ve endi», – dep bildire Alımçevniñ aytqanlarını kütleviy haber vastaları.
O, binağa ciddiy zarar ketirilmedi, dep bildire.
«Qorqulacaq bir şey yoq, tüzetile bile. Ciddiy bir zarar ketirilmedi. Er şeyni yahşı incelep yapacaqmız», – dep qoştı Alımçev.
Qırımnıñ sabıq Rusiye medeniyet naziri Arina Novoselskaya Bağçasaray tarihiy-medeniy ve arheologik müzey qoruğınıñ 16 obyektiniñ «restavratsiyasına» «2 milliard ruble berilgen», dep aytqan edi. Qırımnıñ Rusiye yolbaşçısı Sergey Aksenov Han sarayınıñ «restavratsiyası» 2021 senesi bitecek, dep bildirgen edi.
2021 senesi sentâbr ayında UNESCO resmiy saytında UNESCO baş müdiriniñ Qırım Muhtar Cumhuriyetindeki vaziyet monitoringinen bağlı maruzası derc etildi. Vesiqada Bağçasaraydaki Han sarayınıñ işleri qayd etile, maruzağa köre, bu işler «saraynıñ tarihiy-medeniy emiyeti içün kerçek bir telüke ola».
2021 senesi oktâbr ayında Ukraina Tış işler nazirligi UNESCO maruzasında berilgen malümat «vaqtınca işğal etilgen Qırım ve Aqyarda insan aqları vaziyetiniñ daa beter olğanını köstere», dep haber etti.
Rusiyeniñ UNESCO vekili Aleksandr Kuznetsov Rusiye ve UNESCO arasında Qırımnen bağlı muzakereleri yoq ve yaqın vaqıtta olmaycaq, dep bildirgen edi.
Qırım işğalinden soñ Rusiye Qırımda medeniy ve tarihiy emiyeti olğan bütün obyektlerni öz yurisdiktsiyası altına aldı. Kyiv, olar Ukraina halqına ait olğanını israr etip, mezkür obyektlerni UNESCO imayesi altına almağa rica ete.
UNESCO Dünya mirası cedveline işğal altındaki Qırımnıñ «Tavrik Hersones» qoruğı kirmekte. Cedvelge kirsetilecek namzetler arasında Bağçasaraydaki Hanlar sarayı, Sudaqtaki Ceneviz qalesi, Qırım astrofizik observatoriyası, Manğup Qale, Eski Kermen ve Çufut Qale bar.
