2019 senesi Ukraina parlament saylavlarında eñ büyük mesele - bu gibrid Rusiye tecavuzı edi, o "ukrainlerge Qırımda ve işğal etilgen Donbass topraqlarında mebuslarnı saylamağa imkân bermedi", dep saya Halqara ukrainler kongressiniñ (HUK) halqara közeticiler komissiyasınıñ başı Yevğen Çoliy.
Bu aqta o, iyül 22-sinde Kyivde briefing vaqtında ayttı.
Umumen alğanda, onıñ aytqanına köre, Ukrainada parlamet saylavları, demokratik saylavlarnıñ halqara talaplarına uya edi, qayd etilgen bozmalar ise emiyetsiz edi ve halqanıñ irade köstürüvine tesir etmedi.
Nuqsanlıqlar arasında o, esli başlılar ve imkâniyeti sıñırlanğan şahıslar içün rey bermege qıyın olğanını qayd etti.
Qırım.Aqiqatqa tefsir bergende, ukrain diasporasınıñ teşkilâtınıñ vekili, HUK daima Qırımdaki vaziyetni közete ve halqara fotumlarda ilhaq etilgen yarımadanıñ meseleleri aqqında beyan ete, dep bildirdi.
"Halqara cemiyet buña bir cevap köstersin dep, Ukraina bütünley topraqlarını qaytarmağance, sanktsiyalarnı küçleştirsin dep, daima çağırtamız", - dedi Çoliy.
2019 senesi iyül ayında Rusiye, HUK - "Rusiye havfsızlığı ve anayasa tiziminiñ temelleri içün telüke olğan, istenilmegen teşkilât" dep ilân etti.
Yevğen Çoliy, bu qararğa "Rusiyede ukrain diasporasına basqı ve onı qalğan diasporadan ayırmaq ıntıluvı", dep ayta.
