Dekabrniñ 10-nda qayd etilgen Halqara insan aqları künü munasebetinen Qırımtatar resurs merkezi içtimaiy ağlarda "Qırımnıñ işğalden azat etilüvi — insan aqlarınıñ qaytarıluvı" yazısınen furtuna başlata.
Qırımtatar Milliy Merkezi er bir istegen insannı, olarnıñ saytında teklif etilgen ve Qırımnıñ işğalden azat etilmesi ve qırımtatar halqına birdemlik içün #LIBERATECRIMEA halqara areketiniñ faalleri tarafından azırlanğan ve ukrayin ressamı Andriy Yermolenko tarafından resmiyleştirilgen plakatlardan birini içtimaiy ağlarda yerleştirmege çağıra.
"Er kesni işğal etilgen topraqlarda işğal rejiminiñ qurbanları olğan semetdeşlerimizge birdemlik köstermek ve Qırımtatar Milliy Meclisiniñ qanunlaştırılmasını tezleştirmege yardım etmek içün "Qırımnıñ işğalden azat etilüvi — insan aqlarınıñ qaytarıluvı" furtunasına qoşulmağa ve içtimaiy ağlardaki saifelerinde (Facebook, Twitter, Instagram, Telegram) plakatlardan birini tarqatmağa çağıramız, ", — dep haber ete teşkilâtnıñ matbuat hızmeti.
QMC-de qayd ettiler ki, "2014 senesi Qırım işğalinden soñ Rusiye Federatsiyası, öz qanunlarını siyasiy maqsatlarda qullanıp, yarımadada qırımtatarlar ve Ukrayina tarafdarları olğan faallerge qarşı kütleviy repressiyalar başlattı".
QMC malümatına köre, Rusiye Qırım yarımadasını işğal etkeninden berli 370 siyasiy sebepli cinaiy taqip qayd etildi, olardan 228 qırımtatarlarğa qarşı.
Roskomnadzor Qırım.Aqiqat saytını blok etti.Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
