Fevralniñ 21-nde dünya Halqara ana tili kününi qayd ete. UNESCO malümatına köre, bu yıl tedbirniñ mevzusı – «turğun inkişaf, barışıq pekitilüvi ve muabbetleşüv içün müim olğan tamır halqlarnıñ tilleri».
«Dünyada insanlarnıñ 40%-ı laf etken ya da añlağan tilde tasil alıp olamay», – dep bildire teşkilât, dep haber ete Azatlıq Radiosı.
Tahminen 370 mln insan tamır halqlarnıñ temsilcisi ola, olarnıñ tilleri dünyadaki 7000 canlı tilniñ ekseriyetidir, dep bildire UNESCO.
Bugün Parijdeki UNESCO merkezinde tillerni qorçalamaq müim olğanına dair munaqaşalar keçirilecek.
Rusiye Qırımnı ilhaq etken soñ faal ve aq qorçalayıcılar yarımadada qırımtatar tilini inkişaf ettirmege ve saqlap qalmağa zor olğanını bildire.
Qırımtatar Milliy Meclisiniñ azası Eskender Bariyevniñ bildirgenine köre, yarımadada qırımtatar tilinde tasil bergen 16 mektepten yedi danesi qaldı. Aynı vaqıtta, yarımadada işğalden soñ qabul etilgen «Qırım Cumhuriyeti Anayasasınıñ» 10-uncı maddesi qırımtatar, ukrain ve rus tillerine devlet tili statusını bere.
Daa evel Ukraina tasil ve ilim naziri Liliya Grineviç Rusiye ilhaq etken Qırımda ukrain ve qırımtatarlarnıñ ana tilinde ders almaq aqqı bozula, dep bildirgen edi.
Ukraina Anayasasınıñ 10-uncı maddesine binaen, Ukrainanıñ devlet tili ukrain tili sayıla. Sotsiologlarnıñ malümatına köre, vatandaşlarnıñ üçte ekisi ukrain tilini ana tili dep saya.
