Cumaertesi künü, fevralniñ 22-nde, Halqara ana tili kününde Nefes cemaat teşebbüsi ekinci qırımtatar tili diktantını keçirecek. Onıñ esas maqsadı belli bir insannıñ savatını teşkermek degil, birlik aktsiyasını keçirmektir, dep bildire Qırımtatar Milliy Meclisiniñ reisi Refat Çubarov Facebook saifesinde.
«Diktantnı istegen er kes yaza bile, yaşı, milleti, yaşağan yeri ve qırımtatar tilini bilüv seviyesi müim degil. Evde, işte, seyaatta, bir özüñih ya da dostlarıñız ve tuvğanlarıñıznen beraber aktsiyada iştirak etiñiz!», – dep aytıla haberde.
Çubarovnıñ bildirgenine köre, diktant Aqmescitten Qırım saatınen 15:00-da Nefesniñ Facebook saifesinde keçirilecek, onı belli qırımtatar şairesi, oca Emine Üsein oquycaq.
Nefesniñ Facebook saifesinde diktantta iştirak etüv şartları haber etile:
- Onı elnen, añlaşılğan bir şekilde, latin ya da kiril urufatında (istekke bağlı) yazmaq kerek.
- Diktant bitken soñ metinni (fotoresimi ya da skanı) Nefes (qrm.nefes@gmail.com) elektron poçtasına yollamaq içün 15 daqqa berilecek, ad, adres, telefon nomerası ve saife bağlantısı (Facebook, Instagram) mıtlaqa qayd etilmeli.
- Tarafsız qıymet kesilsin dep, iş üzerinde bu malümat qayd etilmey.
- Oqulması küç olğan işler, yahşı yapılmağan foto ve skan kopiyaları teşkerilmeycek.
- Hata yapmağan diktant müellifleri qıymetli bahşışlar alacaq.
- Neticeler Nefesniñ Facebook ve Instagram (@__.n.e.f.e.s.__) saifelerinde ilân etilecek.
- Teşkilâtçılar online diktantta iştirak etkeniniñ foto ve videolarını #Nefe heşteginen içtimaiy ağlarda paylaşıp, @Nefes (Facebook), @__.n.e.f.e.s.__ (Instagram) qayd etse ya da elektron poçtağa (qrm.nefes@gmail.com) yollasa, ayrı bahşışlar alacaq.
2018 senesi işğal etilgen Qırımda 16 qırımtatar mektebinden yedisi qaldı, dep haber etilgen edi.
İşğal altındaki Qırımnıñ Rusiye akimiyeti umumtasil mekteplerde qırımtatar ve ukrain tili derslerini pek eksiltti. Akimiyet qırımtatarlarnı ana tilini ögrenmek imkânından marum qaldıra, dep bildirgen edi Qırımtatar Milliy Meclisiniñ vekilleri.
İşğalden soñ yarımadada qabul etilgen yañı «anayasanıñ» 10-uncı maddesi qırımtatar, ukrain ve rus tillerine devlet statusını bere.
