Halqara akemlik mahkemesi Rusiyege «Ukrnafta» açıq aktsiyalı şirketine Rusiyeniñ Qırım ilhaqından soñ şirket mülkiniñ «devletleştirüvi» içün $44 mln miqdarında ivaznı ödetmege qarar aldı.
«2019 senesi aprelniñ 12-nde akemlik mahkemesi Rusiye Federatsiyasına «Ukrnafta» açıq aktsiyalı şirketine Qırımda «Ukrnafta» yatırımlarınıñ devletleştirüvi ve $3,5 mlndan ziyade akemlik masrafları içün $44 mln 455,012 biñ ivaz ödetmege qarar aldı», – dep aytıla cermay şirketiniñ haberinde.
Akemlik mahkemesiniñ qararına binaen, 2014 senesi aprelniñ 22-nden başlap ivaz miqdarına fayızlar qoşula. 2019 senesi aprel ayına qadar fayızlarnıñ miqdarı $5,5 mlndan ziyade oldı.
2016 senesi sentâbr ayında Qırım parlamenti yarımadadaki 111 obyektni «devletleştirmege» qarar aldı.
«Ukrnafta» açıq aktsiyalı şirketi Gaagadaki Halqara akemlik mahkemesine muracaat etip, şirketniñ Qırımdaki yaqıt qoyuv stantsiyalarınıñ zapt etilüvinen bağlı yatırımlarını qorçalamaq içün Rusiyege qarşı dava açtırğan edi.
«Ukrnafta» cermaynı qazıp çıqarğan eñ büyük Ukraina şirketi sayıla. «Ukrnaftanıñ» 50%+1 «Naftogaz Ukrainı» milliy aktsiyalı şirketine ait, aktsiyalarnıñ aman-aman 42%-ı – PrivatBanknıñ sabıq aktsionerlerinen bağlı şirketler gruppasına.
