Prezident yanındaki «Halq hızmetçisi» («Sluğa narodu») firqası doquzıncı çağırılış Yuqarı Radada ortaq firqalarnı celp etmeyip, çoqluqnı şekillendirip olur. Bunı iyülniñ 22-nde saba Merkeziy saylav komissiyasınıñ saytı keçirgen firqa cedvelleri ve majoritar okruglar boyunca saylavlarnıñ ilk neticeleri köstere. Bu aqta Azatlıq Radiosı haber ete.
«Halq hızmetçisiniñ» siyasiy firqa cedvelleri içün rey berüv neticelerine köre 120-den ziyade yeri olacaq. Daa 110 deputatnı Zelenskıynıñ firqası parlamentke majoritar okrug boyunca keçire.
Böylece, «Halq hızmetçisiniñ» yañı Yuqarı Radada 230-dan ziyade yeri olacaq. Bu oña parlamentniñ reberlik organlarını şekillendirmege ve ükümetni saylamağa imkân berecek. Prezident tarafdarı olğan küç Anayasağa deñişmeler kirsetmek içün ittifaqdaşlarnı qıdırmağa mecbur olacaq. Bunıñ içün 300-den ziyade parlament deputatı kerek.
Protokollarnıñ 46%-ından ziyadesi sayılğan soñ «Halq hızmetçisi» firqasına saylayıcılarnıñ 42%-ından ziyadesi qoltuttı, dep bildire Merkeziy saylav komissiyasınıñ malümatı.
Avgustnıñ 5-ne qadar Milliy saylav komissiyası saylavlarnıñ neticelerini belgilemeli, avgustnıñ 10-na qadar ise olarnı resmiy matbuatta aydınlatmaq kerekler.
2019 senesi sentâbrniñ 9-na yaqın Rada birinci toplaşuvını ötkermeli.
