Yañı saylanğan halq deputatı Tamila Taşeva "Ses" parlament fraktsiyasınıñ terkibine kirdi. Bunı Yuqarı Rada Reisiniñ birinci muavini Oleksandr Korniyenko bildirdi.
"Halq deputatı Tamila Taşevanıñ "Ses" siyasiy firqası fraktsiyasınıñ erkânına kirgeni aqqında haber etem", — dep bildirdi birinci vitsespiker.
Dekabrniñ 6-nda yañı parlament azaları Tamila Taşeva ve Boğdan Lukaşuk Ukrayina halq deputatı olaraq ant ettiler.
Dekabrniñ 4-nde Ukrayina prezidenti Volodımır Zelenskıy Tamıl Taşevanı Qırım Muhtar Cumhuriyetindeki daimiy temsilcisi vazifesinden boşattı.
Taşeva bundan evel böyle bir niyeti olmağanını ve Ukrayina prezidentiniñ Qırım Muhtar Cumhuriyetindeki daimiy vekili olıp çalışmağa devam etecegini aytsa da, yaqın vaqıtta Ukrayina Yuqarı Radasında çalışıp başlaycaq, dep bildirdi.
Noyabrniñ 25-nde Ukrayina merkeziy saylav komissiyası prezidentniñ Qırım Muhtar Cumhuriyetindeki daimiy vekili Tamila Taşevanı saylanğan halq deputatı olaraq belgiledi. O, mandattan vazgeçüv arizasını bergen İvan Primaçenkodan soñ nevbetteki ola.
«Batkivşçına» fraktsiyasınıñ erkânında Alena Şkrum yerinde olacaq Boğdan Lukaşuk da ant etti. Şkrum dekabrniñ 3-nde cemiyet ve topraqlarnıñ inkişafı naziriniñ birinci muavini oldı.
Boğdan Lukaşuk Hmelnıtskıy şeer şurasınıñ deputatı edi, Hmelnıtskıy rayon devlet memuriyetiniñ reis muavini edi, Hmelnıtskıy şeer yolbaşçısı vazifesine namzetini köstergen edi.
Roskomnadzor Qırım.Aqiqat saytını blok etti.Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
