Link açıqlığı

Saatnıñ esas haberi

«Halqımızğa minnetdarmız»: Aqmescitteki «Hizb ut-Tahrir davasınıñ» mabüsleri soñki sözüni ayttı


Aqmescitteki birinci «Hizb ut-Tahrir davasınıñ» mabüsleri Rostov-na-Donunıñ Şimaliy-Kavkaz okrugınıñ arbiy mahkemesinde, 2019 senesi iyünniñ 17-si
Aqmescitteki birinci «Hizb ut-Tahrir davasınıñ» mabüsleri Rostov-na-Donunıñ Şimaliy-Kavkaz okrugınıñ arbiy mahkemesinde, 2019 senesi iyünniñ 17-si

Rostov-na-Donunıñ Şimaliy-Kavkaz okrugınıñ arbiy mahkemesinde iyünniñ 17-nde Aqmescitteki birinci «Hizb ut-Tahrir davasınıñ» mabüsleri soñki sözüni ayttı. Qabaatlanğan Uzeir Abdullayev, Teymur Abdullayev, Ayder Saledinov, Rustem İsmailov ve Emil Cemadenov 2016 senesi oktâbr ayında apiske alınğanlarından berli olarğa qoltutqan er keske teşekkürler bildirdi. Bu aqta advokat Lilâ Gemeci Qırım.Aqiqat mühbirine ayttı.

«İlk evelâ, olarğa er daim maneviy, fizikiy ve maddiy taraftan qoltutqan halqqa minnetdarlığını bildirdiler. Aman-aman üç yıl devamında mektüplerde, yollağanlarında ve mahkemelerge kelüvlerde is etken sıcaqlıq içün teşekkür bildirdiler. Er biri siyasiy sebeplerden taqip etilgenini, Rusiyede İslâm ile küreş başqa fikirlernen küreşke çevirilgenini qayd etti. Bugünde-bugün tek musulmanlar degil, sistema istegeni kibi tüşünmegen er bir insan taqip etile», – dep qayd etti advokat.

Gemeciniñ aytqanına köre, bu dava boyunca üküm salı künü, iyünniñ 18-nde, çıqarılacaq.

«Er birini büyük apis cezaları beklegenine baqmadan, olar ükümni lâyıq bir şekilde qarşılamağa azırlar. Mahkeme qararını tebessümnen qarşılaycaqlar, dep tüşünem», – dep qayd etti advokat.

Haber etilgeni kibi, qabaatlav tarafı Aqmescitteki birinci «Hizb ut-Tahrir davasınıñ» mabüsleri içün istegen apis cezalarınıñ müddetlerini aydınlattı. Prokuror Teymur Abdullayev içün 17 yıl, Rustem İsmailov içün 13 yıl, Uzeir Abdullayev ve Ayder Saledinov içün 12-şer yıl, Emil Cemadenov içün 11 yıl koloniyada qalmasına üküm etilmelerini istey.

2016 senesi oktâbrniñ 12-sinde Qırımda beş musulman qorantasınıñ evleri tintildi. Tintüvler neticesinde Rusiyede yasaq etilgen «Hizb ut-Tahrir» teşkilâtında iştirak etkenlerinde qabaatlanğan beş qırımtatar: Rustem İsmailov, Uzeir Abdullayev, Teymur Abdullayev, Emil Cemadenov ve Ayder Saledinov tevqif etilgen edi​

Keçken sene dekabrniñ 6-nda belli oldı ki, Aqmescitteki birinci «Hizb ut-Tahrir davasınıñ» mabüsleri Rostov-na-Donu SİZOsına etap etildi.​

«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifeligine birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını 15 «terrorist» birleşme cedveline kirsetip, onı yasaq etti.

«Hizb ut-Tahrir işi» boyunca apiske alınğan ve mahküm etilgenlerniñ imayecileri olarnıñ taqip etilmesi diniy sebeplernen bağlı olğanını tüşüne. Advokatlar qayd etkenine köre, Rusiye uquq qoruyıcı organları tarafından bu dava boyunca taqip etilgenler – ekseriyeti qırımtatarlar ve ukrain, rus, tacik, azeri ve islâm dinini kütken diger millet vekilleri. Halqara uquq işğal etilgen topraqlarda işğalci devlet qanunlarını kirsetmege yasaqlay.

XS
SM
MD
LG