Link açıqlığı

Saatnıñ esas haberi

Rusiye işğal etilgen Herson vilâyetiniñ sakinini «qırımtatar batalyonında» iştirak etkeni içün 8 yılğa üküm etti – Qırımtatar resurs merkezi


Noman Çelebicihan qırımtatar batalyonınıñ bayrağı
Noman Çelebicihan qırımtatar batalyonınıñ bayrağı

Rusiye tarafından qurulğan Herson vilâyetiniñ işğal etilgen qısmınıñ Geniçesk rayon mahkemesi 58 yaşında Halil Kurtametni «Noman Çelebicihan qırımtatar göñülli batalyonında» iştirak etkeni içün 8 yılğa üküm etti, dep haber ete Qırımtatar resurs merkezi.

Rusiye tahqiqatınıñ malümatına köre, 2015 senesi Kurtamet batalyon azalarını yerleştirmek içün Geniçesk vilâyetinde öz ötellerini teminlegen. Bundan ğayrı, tintüv vaqtında tapılğan kâğıtlar arasında «Novooleksiyıvka qasabasında memuriy hızmetlerni teminlev merkeziniñ quruluvına» dair vesiqa bar edi.

Qırımtatar resurs merkeziniñ malümatına köre, Halil Kurtamet iş adamı olıp, Arabat belindeki «Ay-Petri» musafirhanesiniñ saibi ola. Onı Rusiye quvetleri Ukrayinağa qarşı büyük ücüm başlağan soñ tutıp aldı. Kurtametniñ içtimaiy ağlarda saifeleri yoq ve Rusiye-Ukrayina cenkinen bir paylaşuvı olmadı.

Bundan ğayrı, oğlu Appaz Kurtamet de Rusiye apsinde buluna. O, dostuna 500 ğrıvnâ borcqa bergeni içün 7 yılğa üküm etildi, Appaz para yollağan soñ tanışı Ukrayina Silâlı Quvetlerinde hızmet etkenini ögrendi.

Qırımtatar resurs merkezi bildirgenine köre, 2014 senesinden başlap Rusiye Federatsiyası «Noman Çelebicihan batalyonında» iştirak etüv manaçığınen 50 Ukrayina vatandaşını tuttı, 31-i Herson vilâyetiniñ işğal etilgen qısmında yaşay.

Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.

XS
SM
MD
LG