İşğal etilgen Qırımnıñ Canköy rayonındaki Haklay (Mayskoye) qasabasında arbiy yedekler anbarında yüz bergen detonatsiya neticesinde eki adam zar körgen. Bunı qaza yerine kelip çıqqan Qırımnıñ Rusiye yolbaşçısı Sergey Aksönov haber etti.
"Men, Mudafaa nazirliginiñ malümatına köre, saba arbiy qısımlarından biriniñ arbiy yedeklerniñ muvaqqat saqlanması içün meydannıñ territoriyasında yanğın çıqqan Canköy rayonıñ Qalay köyünde bulunam. Detonatsiya alâ daa devam etmekte. Eali arasında zarar körgen eki adam bar, amma olarnıñ ayatına iç bir telüke yoq", - dep yazdı o.
Onıñ qayd etkenine köre, "adamlarnıñ telükesiziligini temin etmek maqsadınen" meskün yerden ealiniñ tahliyesi devam etmektedir.
Avgustnıñ 16-sında saba saatlarında işğal etilgen Qırımnıñ Canköy rayonında patlav sesleri eşitilgen. Yerli telegram kanalları Canköy rayonıñ Haklay köyünde elektrik stantsiyası yanğanını haber ettiler. Aynı zamanda "Krımskiy Veter" telegram kanalı "anda arbiy yedekler anbarından detonatsiya" olğanını bildire. Arbiy yedekler anbarından patlavlar aqqında malümatnı Qırımtatar Milliy Meclis reisi Refat Çubarov tasdıqladı.
Biraz soñra işğal etilgen Qırımnıñ Canköy rayonındaki Haklay qasabasınıñ Rusiye memuriyeti patlavlarnıñ sebebi arbiy yedeklerniñ detonatsiyası olğanını bildirdi.
Rusiye Mudafaa nazirligi Qırımnıñ Canköy rayonındaki Haklay qasabasında arbiy yedekler anbarında yanğın çıqqanını bildirdi.
Haklay köyü Canköyden 25 km cenüp-şarqtadır, köyden Kerçke ketken demiryol hattısı keçe ve anda Qalay stantsiyası yerleşe.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
