Rusiye kütleviy haber vastalarınıñ saytları Anonymous gruppasınıñ kütleviy haker ücümine oğradı. TASS, «Kommersant», «İzvestiya», «Takiye dela», «Fontanka», Forbes, RBK ve diger medianıñ saytlarına ücüm etildi,
«Putin bizni aldatmağa zorlay ve telükege oğrata. Bu bizge ne içün kerek? Putinniñ dersliklerde olması içünmi? Bu cenk bizim degil, onı qaldırayıq!», — dep aytıla hakerler derc etken haberde.
«Bu beyanat silinecek, bazılarımıznı ise işten boşatırlar ya da apiske alırlar. Amma artıq dayanamaymız», — dep aytıla «Rusiyeniñ lâqayt qalmağan jurnalistleri» dep imzalanğan haberde. Anda ölgen 5300 Rusiye askeri aqqında da aytıla — bu raqamnı Ukraina silâlı quvetleriniñ Baş ştabı bildirdi.
Anonymous, Rusiyeniñ Ukrainağa ücüm etken ilk künü, fevralniñ 24-nde, Rusiye devlet müessiseleri ve kütleviy haber vastalarınıñ saytlarına ücüm etecek, dep bildirdi. Kreml, Devlet duması, Mudafaa nazirligi ve diger devlet müessiseleriniñ saytları ücümge oğradı.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: rukrymr.azureedge.net
