Rusiye İçki işler Nazirliginiñ Qırım İdaresiniñ matbuat hızmeti, Kezlevde yol qazası neticesinde üç yaşlı bala zararlanğanını haber etti.
Polislerniñ malümatına köre, yol qazası Polupanova soqağında yüzberdi. VAZ maşnasınıñ aydayıcısı süratnı arttırıp, naqliye idaresini becermedi ve yoldan tış çıqıp, elektrik tayanğıçqa uruldı.
“Yol qazası neticesinde aydayıcı ve üç yaşlı yolcu yaralandı ve hastahanege yatqızıldı. Qaza boyunca teşkerüv keçirile, polis hadimleri belgiley - yol areketi vaqtında cocuq bala kreslosında otura edimi ya da Yol Areketi Qaidelerini bozıp yürgüzile edimi”, - dep aytıla beyanatta.
Noyabr 21-nde Spat (Gvardeyskoye) qasabasında avtobus ve “Wolksvagen” maşnasınıñ çatışuvı neticesinde yengil maşna aydayıcısı elâk oldı, dört yolcu yaralandı.
Bir kün evelsi Aqmescit tübünde avtobus ve yengil maşna urulğanı neticesinde bir adam elâk oldı ve beş kişi zararlandı. Reys avtobusı Saq-Aqmescit marşrutından kete edi. Şimdilik yol qazasınıñ sebepleri belli degil.
