“Veciye Kaşka davası”nıñ mabüsleri Bekir Degermenci, Ruslan Trubaç ve Kâzim Ametovnı kartserge oturtmay ediler. Bu aqta tevfiq etilgenlerniñ advokatı Nikolay Polozov öz Facebook saifesinde yazdı.
Böylece o, dava iştirakçilerini kartserge oturttılar dep Ukraina Yuqarı Radasınıñ insan aqları vekâletlisi Lüdmila Denisova degenini red etti.
“Kartserge olarnı oturtmadılar. Bu yahşı haber. Aynı zamanda olarnıñ episi içün, tahqiqat istegen ve mahkeme tarafından bir qaç kere taqdirlengen, tevfiq etüv şeklinde sıñırlayıcı tedbirler, adalet maqsat ve vazifelerine uymay, ve bundan ğayrı işğal etilgen Qırımda rusiye quvtçileri tarafından olarğa büyük bir basqıdır”, - yazdı Polozov.
«Veciye Kaşka davasınıñ» mabüsleri Bekir Degermenci, Ruslan Trubaç, Kâzim Ametovnıñ nezaret altında qalma müddetleri dekabrniñ 7-ne qadar uzatıldı. Asan Çapuh ev apsinde qaldırıldı.
2017 senesi noyabrniñ 23-nde Aqmescitte Rusiye telükesizlik hadimleri, Kâzim Ametov, Asan Çapuh, Ruslan Trubaç ve Bekir Degermencini tutıp aldı.
Olar Türkiye vatandaşından para talap etüvde şeklene. Rusiye uquq qoruyıcıları faallerni tutqanda qırımtatar milliy areketiniñ veteranı Veciye Kaşka yaramadı. İlk yardım maşinasında qadın can berdi.
İşbu dava iştirakçileriniñ sağlıq problemleri bar. Degermenci – astma hastasıdır, Çapuh SİZOda mikroinsult keçirdi.
İşğalden soñ Qırımdaki faktik Rusiye akimiyeti mustaqil jurnalistler, vatandaş faalleri, Qırımtatar Milliy areketiniñ faalleri, Qırımtatar Milliy Meclisiniñ azaları ve Rusiyede yasaq etilgen «Hizb ut-Tahrir» teşkilâtı ile alâqalı olğanlarından şübheli sayılğan Qırım musulmanlarınıñ evlerinde muntazam surette kütleviy tintüvler ötkere.
