Oktâbrniñ 7-nde cumaaqşamı künü Canköydeki RF Silâlı quvetleriniñ obyektlerine darbe endirilgen edi, dep bildirdi Ukrayina istihbaratınıñ temsilcisi "Suspilne"ge.
"Al-azırda işğalcilerniñ ğayıpları aqqında malümat teşkerile", - dep yazıla bildirmede.
Oktâbrniñ 7-nde aqşam telegram kanalları Canköy civarında patlavlar yüz bergeni aqqında haber etken ediler. Biraz soñra RF Mudafaa nazirligi ukrayin raketasınıñ urıp tüşürilüvi aqqında haber etken edi, amma bunıñ ne yerde olğanını olar bildirdimediler.
Muarririyet ne Ukrayina ne Rusiye tarafınıñ malümatına teşkerip olamay.
2022 senesi avgust ayından başlap Qırım ve Aqyarda aman-aman er kün patlav sesleri eşitile. Rusiye akimiyeti bunı «Ukrayina uçucısızlarına» qarşı ateş ve «ava mudafaa sistemasınıñ işi» dep añlata. Qırımnıñ Rusiye yolbaşçısı Sergey Aksönov uçucısızlarnı yarımada içün «esas telüke» dep adlandırdı. 2022 senesi oktâbr ayında Qırım (Keriç) köpründe patlav oldı. Daa bir patlav 2023 senesi iyülniñ 17-nde oldı. Avgustnıñ 12-nde Rusiye akimiyeti Keriç köprüne yapılğan daa eki ücüm aqqında bildirdi. Yarımadada yüksek (sarı) terror telükesi seviyesi devam ete. Aqmescit ava limanı qapalı.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
