Link açıqlığı

Saatnıñ esas haberi

Tevfiq tilgen ukrain deñizciler Qırımdan çıqarıldı


Ukrain deñizcilerden birisini Aqmescitte maheme binasından çıqaralar, 2018 senesi, noyabr 27

Qara deñizde zapt etilgen ve Aqmescitte tevfiq etilgen ukrain arbiy deñizcilerni Qırımdan Moskovağa alıp keteler. Bu aqta qırımtatar faali Nariman Celâl advokatlarnıñ aytqanına atıf etip Qırım.Aqiqatqa bildirdi.

Bu haberni advokatlar Cemil Temişev, Emine Avamileva ve Ayder Azamatov da Qırım.Aqiqatqa tasdıqladı.

Deñizcilerniñ Lefortovo SİZOsına alıp ketilecegi tahmin etile.

Nariman Celâl Qırım.Aqiqatqa aytqanına köre, Keriçte bulunğan yaralanğan deñizciler noyabr 29-ında Aqmescitke ketirilgen edi.

TASS rusiye haber agentligi, Keriç hastahanesinde yaralı yatqan eki deñizci ve bir SBU hadimini noyabr 29-ında Keriç hastahanesinden çıqardılar.

Qaç deñizci Qırımdan çıqarılğanı daa belli degil.

Kreml nezareti altındaki Aqmescitniñ Kiyev rayon mahkemesi, Keriç boğazında tutılğan Ukraina deñizcileri ve Ukraina telükesizlik hızmetiniñ hadimlerini 2019 senesi yanvarniñ 25-ne qadar tevqif etti. Keriç hastahanesinde yaqtqan daa üç deñizcini Keriç şeer mahkemesi tevfiq etti. Olar da 2018 senesi yanvar 25-ine qadar apiste bulunacaq. Ukraina askerleri 6 yılğa azatlıqtan marum qala bile.

QMC prokuraturası FSB tutqan ukrain deñizcilerini cenk esiri dep saya.

Ukraina Arbiy deñiz quvetleri bildirgenine köre, noyabrniñ 25-nde Rusiyeniñ sıñır gemileri Odesa limanından Azaq deñizinde Mariupolge keçken Ukraina Arbiy deñiz quvetleriniñ gemilerine qarşı «açıq istilâiy areketler» kerçekleştirdi. Rusiyeniñ «Don» sıñır kateri Ukraina Arbiy deñiz quvetleriniñ «Yañı Qapu» reyd buksirine aselet çarptı.

Хронология кризиса в море (видео)
Bekleñiz, lütfen

No media source currently available

0:00 0:02:03 0:00

Qırımdaki Rusiye FSB idaresi bildirgenine köre, noyabrniñ 25-nde Ukrainağa ait üç arbiy gemi «Rusiyeniñ devlet sıñırından qanunsız» keçip, Keriç boğazı yolunda «telükeli areketler» yaptı.

Daa soñra belli oldı ki, FSB Qara deñizde Ukraina gemilerine qarşı silâ qullandı. Kyivniñ malümatına köre, FSB açqan ateş neticesinde altı Ukraina askeri yaralandı. Rusiye FSBsi Ukraina gemilerine qarşı silâ qullanılğanını tasdıqlap, yaralanğan üç Ukraina deñizcisi aqqında haber etti.

Ukraina Havsızlıq hızmetinde (SBU), ukrain deñizcilerinen beraber gemilerde eki SBU hadimi olğanını bildirdi.

Noyabrniñ 26-nda Ukraina Yuqarı Radası Keriç boğazında Rusiye arbiyleri tarafından Ukraina gemilerine açılğan ateş sebebinden bir qaç vilâyette cenk vaziyetini ilân etti.

Rusiyeniñ Keriç boğazında yapqanlarını bir sıra Avropa memleketi ve ABD tenqit eteler. NATO, vaziyetni ve Keriç boğazındaki adiselerni diqqatnen közetkenini bildirip, ağır-sabırlı olmağa ve vaziyetniñ daa beterine yol açmamağa çağırdı.

XS
SM
MD
LG