İlhaq etilgen Qırımda qırımatatar faaleri noyabr 25-inde Keriç boğazındaki vaqialardan soñ tutulğan ve tevfiq etilgen ukrain deñizcileri içün mahsulat ve eşya toplanmasını ilân etti.
Qırımtatar milliy areketiniñ faalcisi Nariman Celâl, mahsulat ve eşyanı deñizcilerge Aqmescit SİZOsına ketirilecegini bildirdi.
Celâl zarur olğan şeylerniñ cedvelini derc etti: 44 ölçüsinde papuc, kenef malzemeleri (kenef kâğıtı, sabun, tış fırçı, tış pastası, ustra), kürpeler (pırnıç, qara boğday ve ilâhre), tez pişken laqşa, çay, qave (azır, çekilgen), şeker (sarğılıqlı), kolbas (sarğılıqlı), sebze (qartop, soğan), meyva (alma, banan), ösümlik yağı (küçük şişede), ötmek sarğılıqlı, qoyurtılğan süt, sigaret blokı.
Faalci, noyabr 28-inde çarşenbe künü Aqmescitte Vorovskogo soqağında Rusiye nezareti altındaki Kiyev rayon mahkemesi binası yanında saat 10:30-dan saat 17:00-ğace bulunacağı aqqında bildirdi. O, dostlarınen beraber şahsen özü mahsulat ve eşyanı cıyacağı aqqında ayttı.
Noyabr 27-sinde Rusiye nezareti altındaki Aqmescit Kiyev rayon mahkemesi 24 ukrain deñizcisinden 12-sini tevfiq etti. Andriy Oprısko, Sergiy Tsıbizov, Yuriy Budzılo, Volodımır Tereşçenko, Viktor Bespalçenko, Volodımır Varimez, Mıhaylo Vlasük, Bogdan Golovaş, Sergiy Çulıba, Volodımır Kostışın, Sergiy Popov ve Roman Mokrük apiske alındı.
Aqmescitte Rusiye mahkemesi tevfiq etken ukrain deñizcilerine 6 yılğa qadar apis cezası berile bile.
QMC prokuraturası FSB tutqan ukrain deñizcilerini cenk esiri dep saya.
Ukraina Arbiy deñiz quvetleri bildirgenine köre, noyabrniñ 25-nde Rusiyeniñ sıñır gemileri Odesa limanından Azaq deñizinde Mariupolge keçken Ukraina Arbiy deñiz quvetleriniñ gemilerine qarşı «açıq istilâiy areketler» kerçekleştirdi. Rusiyeniñ «Don» sıñır kateri Ukraina Arbiy deñiz quvetleriniñ «Yañı Qapu» reyd buksirine aselet çarptı.
Qırımdaki Rusiye FSB idaresi bildirgenine köre, noyabrniñ 25-nde Ukrainağa ait üç arbiy gemi «Rusiyeniñ devlet sıñırından qanunsız» keçip, Keriç boğazı yolunda «telükeli areketler» yaptı.
Aqşamğa yaqın Rusiye ukrain gemilerini keçirdi, amma birazdan atışlar aqqında belli oldı. Ukraina Arbiy deñiz quvetleriniñ malümatına köre, ücüm neticesine altı ukrain arbiyi yaralandı. Rusiyede silâ qullanuvını tasdıqladılar ve üç yaralanğan ukrain deñizcisi aqqında haber ettiler.
Ukraina Yuqarı Radası, noyabr 26-sında aqşam bir sıra vilayette Azaq ve Qara deñizleriniñ içki suvlarında cenk vaziyetini ilân etti.
Rusiyeniñ Keriç boğazında yapqanlarını bir sıra Avropa memleketi ve ABD tenqit eteler. NATO, vaziyetni ve Keriç boğazındaki adiselerni diqqatnen közetkenini bildirip, ağır-sabırlı olmağa ve vaziyetniñ daa beterine yol açmamağa çağırdı.
Soñki vaqıtları Azaq deñizi Rusiye uquq qoruyıcıları, birinciden Ukraina limanlarına ketken ve andan kelgen gemilerni tutqan sıñırcıları, tarafından yapılğan provokatsiyalarnıñ yeri oldı.
