Noyabr 27-sinde Kreml nezareti altındaki Qırım Yuqarı Mahkemesi cemaat jurnalisti, bloger Nariman Memedeminovnıñ davasında FSB tahqiqatçısı Aleksanr Parşutinniñ areketlerini qanunsız tanıdı. Bu aqta Qırım.Aqiqat muhbirine onıñ advokatı Edem Semedlâyev haber etti.
İmayecinin aytqanına köre, tahqiqatçı cinaiy davada ekspertizanen tanış olmağa imkân bermey edi. Böyleliknen, mudafaa aqqı bozuldı, çünki advokatlarnıñ alternativ ekspertizanı sımarlamaq ve başqa itirazlarnı azırlamağa imkânı olmadı. Qırım Yuqarı Şurası advokatnıñ şikâyetini qabul etti ve mudafaa tarafını dava malümatınen tanıştırmağa qarar aldı.
Martnıñ 22-nde Bağçasaray rayonında Rusiye telükesizlik hadimleri ve uquqqoruyıcıları Nariman Memedeminovnıñ evini tinttiler. Ondan soñ faaliyetçi Aqmescitteki Rusiye FSBsi idaresine alıp ketildi. Martnıñ 23-nde mahkeme Memedeminovnı tevqif etti.
Memedeminovnı Rusiye CK-nıñ 205 maddesiniñ 2-nci qısmına ait olğan cinayette (İnternet vastasınen terrosistik areketlerge açıq çağıruvlar) qabaatlaylar.
Martnıñ 23-nde QMC prokuraturası, Ukraina Cinaiy kodeksiniñ 146-ncı maddesiniñ 2-nci qısmı (insannı qanunsız olaraq azatlıqtan marum etüv ya da alıp qaçuv) ve 162-nci maddesiniñ 2-nci qısmında (mesken toqunılmazlığınıñ bozuluvı) qayd etilgen cinaiy qanun bozuluvlarınıñ alâmetleri boyunca malümatnı Mahkemeden eveldki tahqiqatlarnıñ umumiy cedveline kirsetti.
Ukraina Milliy jurnalistler birligi (UMJB) Qırımda Memedeminovnıñ tevqif etilmesine «fikir serbestligi ve, cümleden İnternet ağı vastasınen, informatsiyanı serbest almaq ve darqatmaq aqqınıñ bozuluvı» dedi.
