Kremlde, AQŞ prezidenti Donald Tramp (Donald Trump) Rusiye prezidenti Vladimir Putinnen köşüvnilâğu etkeni aqqında resmiy beyanat almağanlarını bildireler dep haber ete rusiye habercileri.
Rusiye prezidentiniñ matbuat kâtibi Dmitriy Peskov, Putin G-20 sammitinde iştirak etmek niyetini deñiştirmegenini beyan etti dep haber ete TASS agentligi.
“Biz Argentinağa ketemiz. Şimdigece tek prezidentniñ Twitterde yazğanını kördik. Resmiy haberimiz yoq”, - Peskovnıñ sözlerinden yaza TASS.
Putinniñ matbuat kâtibi aytqanına köre, Trampnen körüşüv kerçekten lâğu etilse, “Putinniñ faydalı körüşüvler içünbir qaç qoşma saatı peyd olur” dep bildire Rusiye “İnterfaks”ı.
Noyabr 29-ında AQŞ prezidenti Donald Tramp, Keriç boğazında FSB tarafından zapt etilgen ukrain gemiler ve deñizcilerni Ukrainağa qaytarmağanı içünRusiye prezidenti Vladimir Putinnen körüşüvini lâğü etkenini öz Twitterinde bildirdi .
Bir kün evel AQŞ prezidenti Donald Tramp, Keriç boğazındaki “tecavuz” sebebinden Rusiye prezidenti Vladimir Putinnen Argentinada G-20 sammitinde körüşüvni lâğu ete bilecegi aqqında ihtar etti. Haber etile edi ki, Tramp, cuma ve cumaertesi künleri Buenos-Ayreste keçecek G-20 sammitinde Putinnen körüşecek edi. Bu körüşüvde Tramp, mudafaa, silâ nezareti ve Yaqın Şarq ve Ukraina meselelerini muzakere etecek edi.
Ukraina Arbiy deñiz quvetleri bildirgenine köre, noyabrniñ 25-nde Rusiyeniñ sıñır gemileri Odesa limanından Azaq deñizinde Mariupolge keçken Ukraina Arbiy deñiz quvetleriniñ gemilerine qarşı «açıq istilâiy areketler» kerçekleştirdi. Rusiyeniñ «Don» sıñır kateri Ukraina Arbiy deñiz quvetleriniñ «Yañı Qapu» reyd buksirine aselet çarptı.
Qırımdaki Rusiye FSB idaresi bildirgenine köre, noyabrniñ 25-nde Ukrainağa ait üç arbiy gemi «Rusiyeniñ devlet sıñırından qanunsız» keçip, Keriç boğazı yolunda «telükeli areketler» yaptı.
Kreml nezareti altındaki Aqmescitniñ Kiyev rayon mahkemesi, Keriç boğazında tutılğan Ukraina deñizcileri ve Ukraina telükesizlik hızmetiniñ hadimlerini 2019 senesi yanvarniñ 25-ne qadar tevqif etti. Keriç hastahanesinde yaqtqan daa üç deñizcini Keriç şeer mahkemesi tevfiq etti. Olar da 2018 senesi yanvar 25-ine qadar apiste bulunacaq. Ukraina askerleri 6 yılğa azatlıqtan marum qala bile.
QMC prokuraturası FSB tutqan ukrain deñizcilerini cenk esiri dep saya.
Noyabrniñ 26-nda Ukraina Yuqarı Radası Keriç boğazında Rusiye arbiyleri tarafından Ukraina gemilerine açılğan ateş sebebinden bir qaç vilâyette cenk vaziyetini ilân etti.
Rusiyeniñ Keriç boğazında yapqanlarını bir sıra Avropa memleketi ve ABD tenqit eteler. NATO, vaziyetni ve Keriç boğazındaki adiselerni diqqatnen közetkenini bildirip, ağır-sabırlı olmağa ve vaziyetniñ daa beterine yol açmamağa çağırdı.
