FSB ukrain gemilerine atqanda yaralanğan SBU hadimi Vasiliy Soroka ömür arqadaşına telefon etip sağlıq alı aqqında aytıp berdi. Bu aqta Qırım.Aqiqatqa onıñ babası Viktor Soroka haber etti.
“Tünevin öyle imkân berdiler. O apayına telefon etip bir qaç laf aytti: “Sağım, el-ayağım bütün”. Oldı. Atta doğğan kününen hayırlamadı. Amma kelinniñ tünevin doğğan künü edi. Menimce, o sadece FSB ruhset bergen şeylerni ayttı”,- dedi Viktor Soroka.
Onıñ aytqanına köre, oğlu ameliyat keçirdi ve hastahanede edi. Vasiliyniñ ağlığı qqında başqa haber yoq.
Viktor Soroka, reyd, gemilerniñ ücümi ve zapt etüvi vaqtında onen bağ tutmağanını aytıp qoştı.
“Kimse bir şey aytmadı. Dedi: “Komandirovkağa ketem”. Başqa bir şey demedi”, - ikâye etti Vasiliy Soroka.
Bir kün evel Sorokanı rusiyeli Keriç mehkemesiniñ qararına köre eki ayğa tevfiq ettiler. Advokatı Aleksey Ladin, SBU hadiminden itirafşaatlığını almaq içün basqınç yapıla bilecegini beyan ete.
Ukraina Arbiy deñiz quvetleri bildirgenine köre, noyabrniñ 25-nde Rusiyeniñ sıñır gemileri Odesa limanından Azaq deñizinde Mariupolge keçken Ukraina Arbiy deñiz quvetleriniñ gemilerine qarşı «açıq istilâiy areketler» kerçekleştirdi. Rusiyeniñ «Don» sıñır kateri Ukraina Arbiy deñiz quvetleriniñ «Yañı Qapu» reyd buksirine aselet çarptı.
Qırımdaki Rusiye FSB idaresi bildirgenine köre, noyabrniñ 25-nde Ukrainağa ait üç arbiy gemi «Rusiyeniñ devlet sıñırından qanunsız» keçip, Keriç boğazı yolunda «telükeli areketler» yaptı.
Aqşamğa yaqın Rusiye ukrain gemilerini keçirdi, amma birazdan atışlar aqqında belli oldı. Ukraina Arbiy deñiz quvetleriniñ malümatına köre, ücüm neticesine altı ukrain arbiyi yaralandı. Rusiyede silâ qullanuvını tasdıqladılar ve üç yaralanğan ukrain deñizcisi aqqında haber ettiler.
Ukraina Yuqarı Radası, noyabr 26-sında aqşam bir sıra vilayette Azaq ve Qara deñizleriniñ içki suvlarında cenk vaziyetini ilân etti.
Noyabr 27-sinde Rusiye nezareti altındaki Aqmescit Kiyev rayon mahkemesi 24 ukrain deñizcisinden 12-sini tevfiq etti. Andriy Oprısko, Sergiy Tsıbizov, Yuriy Budzılo, Volodımır Tereşçenko, Viktor Bespalçenko, Volodımır Varimez, Mıhaylo Vlasük, Bogdan Golovaş, Sergiy Çulıba, Volodımır Kostışın, Sergiy Popov ve Roman Mokrük apiske alındı.
Aqmescitte Rusiye mahkemesi tevfiq etken ukrain deñizcilerine 6 yılğa qadar apis cezası berile bile.
QMC prokuraturası FSB tutqan ukrain deñizcilerini cenk esiri dep saya.
Rusiyeniñ Keriç boğazında yapqanlarını bir sıra Avropa memleketi ve ABD tenqit eteler. NATO, vaziyetni ve Keriç boğazındaki adiselerni diqqatnen közetkenini bildirip, ağır-sabırlı olmağa ve vaziyetniñ daa beterine yol açmamağa çağırdı.
Soñki vaqıtları Azaq deñizi Rusiye uquq qoruyıcıları, birinciden Ukraina limanlarına ketken ve andan kelgen gemilerni tutqan sıñırcıları, tarafından yapılğan provokatsiyalarnıñ yeri oldı.
