Noyabrniñ 20-nde Hırvatistanda Ukraina elçiligi ile beraberlikte Zagreb universitetiniñ professorı Yevgeniy Paşçenko tarafından hırvat tilinde neşir etilgen "Krim kroz povijest" (Qırım asırlar devamında) kitapnı onlayn taqdim etüv tedbiri azırlana. Onlayn taqdim etüv Qırımtatar Milliy Meclisi temsilcileriniñ, ekspertlerniñ ve Hırvatistandaki ukrainlerniñ iştiraginen keçirilecek, dep haber ete Ukraina TİN matbuat hızmeti.
Berilgen malümatqa köre, noyabrniñ 16-nda Ukraina elçiligi Zagrebde bu kitapnıñ ilk tanıtıluvını keçirgen. Tedbirde Hırvatistannıñ akademik ve ekspertler dairesiniñ temsilcileri iştirak etken.
Kitapta yarımadanıñ tarihiy adları, milletlerara munasebetler, Qırımda peyda olğan zemaneviy etnoslar, Qırımnıñ Rusiye tarafından işğali ve tarihnıñ diger aspektleri aqqında ikâye etile.
2014 senesi fevral ayında Qırımda işaretsiz urbada silâlı insanlar peyda oldı. Olar Qırım Yuqarı Şurası, Aqmescit ava limanı, Keriç parom keçiti, diger strategik obyektlerni zapt etip, Ukraina ordusınıñ areketlerini blok etken edi. Rusiye akimiyeti bu insanlarnıñ Rusiye ordusınıñ arbiyleri olğanını başta inkâr etken edi. Daa soñra Rusiye prezidenti Vladimir Putin bular Rusiye arbiyleri olğanını tanıdı.
2014 senesi martnıñ 16-nda Qırım ve Aqyarda yarımada statusınen bağlı dünyada tanılmağan «referendum» olıp keçti, onıñ neticesinde Rusiye Qırımnı öz terkibine aldı. Ukraina, Avropa Birligi, ABD «referendumdaki» rey neticelerini tanımadı. Rusiye prezidenti Vladimir Putin martnıñ 18-nde Qırımnıñ Rusiyege «qoşulğanını» ilân etti.
Halqara teşkilâtlar, Qırımnıñ işğali ve ilhaqını qanunsız tanıp, Rusiyeniñ areketlerini takbih ettiler. Ğarp devletleri bir sıra iqtisadiy sanktsiyalarnı qullandı. Rusiye, yarımadanı işğal etkenini inkâr etip, buña «tarihiy adaletniñ tiklenmesi», dey. Ukrainanıñ Yuqarı Radası 2014 senesi fevralniñ 20-ni, Rusiye tarafından Qırım ve Aqyarnıñ muvaqqat işğali başlağan künü olaraq resmen ilân etti.
