Salı künü, fevralniñ 25-nde, Kyivdeki Rusiye elçihanesi ögünde faaller aq qorçalayıcılar işğalniñ ilk qurbanı dep adlandırğan qırımtatar faali Reşat Ametovğa bağışlanğan «Referen «DOOM»: Ukrainanıñ kerçek Qaramanı ve «Qırım halqınıñ» «barışıq saylavı» aktsiyasını keçirdi.
Qırım.Aqiqat mühbiri bildirgenine köre, «KrımSOS» cemaat teşebbüsiniñ faalleri Rusiyeden yarımadada işğalden soñ ğayıp olğan insanlarnıñ işlerini tahqiq etmesini talap etken 44-ünci aktsiya oldı.
«Bugünge qadar kimse mesüliyetke çekilmedi. İşğalci akimiyet insan aqları bozuvlarına qulaq asmay ve ğayıp olğanlarnı tapmaq içün bir şey yapmay… Al-azırda Reşat Ametovnıñ hırsızlanması ve öldürilüvi boyunca tahqiqat ileri ketmey», – dep tarif etti aktsiyada «KrımSOS» cemaat teşebbüsiniñ koordinatorlarından biri Olga Kurışko.
Aktsiya vaqtında eki sahte FSB hadimi aktsiyanıñ spikerlerinden biri – qırımtatar faali İsmail Ramazanovnı «hırsızlap alıp ketti». Teşkilâtçılarnıñ aytqanına köre, olar «insanlar Kremlge qarşı çıqqanını kösterse, Rusiye quvetçileriniñ işğal etilgen Qırımda nasıl çalışqanını köstermege istedi».
Kyivdeki Rusiye elçihanesiniñ vekilleri faallerniñ yanına kene çıqmadı.
2014 senesi martnıñ 3-nde saba Aqmescitniñ Maryino qasabasında yaşağan üç balanıñ babası, 39 yaşında Reşat Ametov evden çıqqan edi. Tuvğanlarına arbiy komissarlıqqa barıp, Ukraina ordusınıñ göñüllileri sırasına yazılacağını ayttı. Video kameraları onı, Rusiyeniñ Qırım işğaline qarşı Lenin meydanında Qırım ükümetiniñ binası ögünde bir kişilik narazılıq keçirgen kişini, qayd etti. Videoda körüne ki, Qırım «samooboronasınıñ» bir qaç vekili onı meydanda tutıp, maşinağa mindire. Eki aftadan soñ Reşat Ametov Qarasuvbazar rayonınıñ Ortalan (Zemlâniçnoye) köyü yanındaki tarlada ölü tapıldı. Erkekniñ cesedinde işkence izleri bar edi, başı şeritnen sarılğan edi, yanında ise qırçma tapılğan edi. Daa soñra çıqarılğan neticelerge köre, ölümniñ sebebi közüne saplanğan pıçaq yarası oldı.
2017 senesi Ukrainanıñ beşinci prezidenti Petro Poroşenko 2014 senesi baarde öldürilgen qırımlı Reşat Ametovğa Ukraina Qaramanı unvanını berdi.
BM insan aqları Yuqarı komissarınıñ idaresi azırlağan maruzasında Ametovnıñ öldürüvini mahkemesiz idam dep adlandıra.
2014 senesi fevral ayında Qırımda işaretsiz urbada silâlı insanlar peyda oldı. Olar Qırım Yuqarı Şurası, Aqmescit ava limanı, Keriç parom keçiti, diger strategik obyektlerni zapt etip, Ukraina ordusınıñ areketlerini blok etken edi. Rusiye akimiyeti bu insanlarnıñ Rusiye ordusınıñ arbiyleri olğanını başta inkâr etken edi. Daa soñra Rusiye prezidenti Vladimir Putin bular Rusiye arbiyleri olğanını tanıdı.
2014 senesi martnıñ 16-nda Qırım ve Aqyarda yarımada statusınen bağlı dünyada tanılmağan «referendum» olıp keçti, onıñ neticesinde Rusiye Qırımnı öz terkibine aldı. Ukraina, Avropa Birligi, ABD «referendumdaki» rey neticelerini tanımadı. Rusiye prezidenti Vladimir Putin martnıñ 18-nde Qırımnıñ Rusiyege «qoşulğanını» ilân etti.
Halqara teşkilâtlar, Qırımnıñ işğali ve ilhaqını qanunsız tanıp, Rusiyeniñ areketlerini takbih ettiler. Ğarp devletleri bir sıra iqtisadiy sanktsiyalarnı qullandı. Rusiye, yarımadanı işğal etkenini inkâr etip, buña «tarihiy adaletniñ tiklenmesi», dey. Ukrainanıñ Yuqarı Radası 2014 senesi fevralniñ 20-ni, Rusiye tarafından Qırım ve Aqyarnıñ muvaqqat işğali başlağan künü olaraq resmen ilân etti.
