Link açıqlığı

Bu sene qırımtatarlar Hıdırlez bayramını cumaertesi, mayıs 3 künü, qayd etecekler. Bunı tedbirniñ azırlavı boyunca teşkiliy komitetniñ azası Emine Avamileva bildirdi, dep yaza 15 minut.

Onıñ aytqanı kibi, bayramnıñ, adet üzre, bazar künü keçirilgenine baqmadan, bu sene Hıdırlezni cumaertesi künü qayd etecekler.

«Adetimizge köre, bayramnı mayıs birinci bazar kününde qayd eteler. Amma bu sene bu kün mayıs dörtü ve ondan soñ iş künü olacağından sebep, biz Meclisniñ teşkiliy komitetiniñ toplaşuvında onı cumaertesi künü keçirmege qarar aldıq», — dep bildirdi o.

Onıñ bergen malümatına köre, tebdir saat 10-dan 18-gece devam etecektir.

«Menimce, azırlav, teşkiliy qısımlar deñişmeyip qalır», - dep işandırdı o.

Hatırlatamız, Hıdırlez tedbiri adet üzre Aqmescit-Bağçasaray yol boyundaki meydanında keçirile. Er yıl mında Qırımnıñ çeşit köşelerinden biñlerce qırımtatarlar kele.
XS
SM
MD
LG