Rusiye quvetçileri Yalta rayonınıñ Gurzuf qasabasında yerli sakinni RF ordusını "itibardan tüşürüv" maddesi ile yaqalağanlar. Erkek 15 künge ve 40 biñ ruble para cezasına mahküm etilgen. Bunı Qırım boyunca İİN matbuat hızmeti haber ete.
Haber etilgeni kibi, 34 yaşındaki erkek "umumiy yerlerde RF SQ itibardan tüşürgen laflar aytqan ve federal qanunlar tarafından yasaq etilgen natsist imalarını numayış etken ve şiarlarını qıçırğan.
Bundan ğayrı erkek başqa erkekni köteklegeninde de qabaatlana eken. Berilgen malümatqa köre, zarar körgen kişiniñ oğlu arbiy ve "mahsus arbiy ameliyat" mıntaqasında hızmet ete eken.
Figurantnıñ adı ve soyadı belli degil. Muarririyet bu malümatnıñ doğrulığını teşkermege tırışa.
Rusiyede ve işğal etilgen topraqlarda Ukrayinanı desteklegen faallerniñ taqip etilmesi devam ete. Rusiyege qoltutqan bloger Aleksandr Talipov Telegram kanalında Ukrayina tarafdarlarınıñ şahsiy malümatını derc ete. Onıñ şikâyetleri esasında qırımlılar Rusiye ordusını "itibardan tüşürgeninde" qabaatlanıp, memuriy ve cinaiy mesüliyetke çekile. Ukrayina prokuraturası Talipovğa qarşı "milletlerara nefret doğuruv" maddesine istinaden cinaiy tahqiqat başlattı.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
