Rusiye Qara deñizde 10 gemi tuta, aralarında raketa taşıyıcıları yoq, dep bildirdi Ukrayına cenübiniñ Mudafaa quvetleriniñ birleşken koordinatsion matbuat merkeziniñ reberi Natalâ Ğumenük.
«Şimdi Qara deñizde 10 gemi bar – sıñır ve teminat gemisi. Raketa taşıyıcıları yoq. Tünevin suvaltı raketa taşıyıcısı yerleşüv noqtasına kirsetildi», – dep tarif etti o, Ukrayına milliy telemarafonı yayınında.
Ğumenük aytqanına köre, şimdi duşman küçlü ava istihbaratını keçire, bu da ücüm azırlığı olaraq tasnif etile bile.
«Biz uçucısızlar ve aviatsiyanıñ faal olğanını köremiz. Darbe içün nişa qıdıradırlar», – dep qoştı matbuat merkeziniñ vekili.
Rusiye dron ve raketalarnı qullanıp, Ukrayına şeerlerine muntazam sürette ateş aça. Delil ve şaatlıqlarğa baqmadan, Moskva Ukrayınada vatandaşlarğa qarşı ücüm yapqanını inkâr ete.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d1ug5n8f9xpr1h.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
