Qırımda Rusiye quvetçileri tarafından evinde tintüv keçirilgen 74 yaşındaki Halilov Halilniñ alı kritik, o, hastahanede buluna. Bu aqta onıñ qızı, ATR telekanalınıñ jurnalisti Gülsum Halilova bildirdi.
Halilovanıñ aytqanına köre, tintüv vaqtında FSB hadimleri yasaq etilgen edebiyat ve silâ tapmağa tırışqanlar. "Bir şey tapmadılar, protokolını tizip, kettiler. Biz ise aqibetlerni kördik", — dep bildirdi jurnalist.
"Elbette, bir şey tapmadılar, çünki bütün ömürlerini itibar ile keçirgen qartlar evinde bir şey tapmaq imkânsızdır. Babam 74 yaşında. Anam öz evinde tınçlıq istegen adiy bir qadın", — dep yazdı o.
Halilova, babası gipertonik hastalıqqa oğrağanını bildire. Tintüv vaqtında o, yataqtan turıp olamağan bile. Çeçek ayınıñ 1-nde oña üç kere acele yardım keldi. Çeçek ayınıñ 2-nde onı hastahanege qoydılar.
Qırımnıñ Qarasuvbazar rayonındaki Ortalan köyünde Rusiye quvetçileri çeçek ayınıñ 1-nde dört qırımtatarlar evinde tintüv keçirgen. Bunı çarşenbe künü Qırımtatar Milliy Meclisiniñ reisi Refat Çubarov Facebook saifesinde bildirdi.
Onıñ aytqanına köre, tintüvler vaqtında Rusiye FSB-siniñ hadimleri silâ ve başqa yasaq etilgen şeylerni, şu cümleden Rusiye akimiyeti tarafından yasaq etilgen cedvelge kirsetilgen kitaplarnı qıdırğanlar. Şu cümleden, Çubarovnıñ yazğanına köre, tintüv ATR telekanalında çalışqan qırımtatar jurnalisti Gülsum Halilovanıñ ana-babasınıñ evinde keçirilgen.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
