Rusiye akimiyeti tarafından mahküm etilgen qırımlı Rustem Gugurik Burâtiyadaki Rusiye koloniyasında tibbiy yardım körmey. Erkekniñ sağlığı bozulaı, dep bildirdi apayı Viktoriya Qırımtatar resurs merkezine.
Qayd etilgenine köre, Gugurikni zor nefes alması, yürek yanması ve tiş ağırması raatsızlay. Yaqında bir qulağı sağırlaştı.
Apayınıñ aytqanına köre, qırımlı ilâclarnıñ terkibi ve maqsadı añlatılmayıp berilgeni içün, ömrü içün telükeli olğanından teklif etilgen ilâclarnı almamağa mecbur ola.
Gugurikniñ aşav problemleri sebebinden er aştan soñ qursağı pek ağıra. Bir sıra ricağa baqmadan, koloniya idaresi mabüsniñ sağlıq vaziyetine qulaq asmay.
2022 senesi oktâbr ayında Rusiyeniñ nezaretinde olğan Aqmescit şeeriniñ Kiyev rayon mahkemesi Rusiyede yasaq etilge «Noman Çelebicihan adına qırımtatar batalyonında» iştirak etüv qabaatı ile Herson vilâyetinden qırımtatar taksici Rustem Gugurikni 8,5 yıl sert apis cezasına mahküm etti.
«Gratı» ukrayın neşriniñ malümatına köre, martnıñ 27-nde aqşam Rustem Gugurik apayı ve 6 yaşındaki qızınen beraber Rusiye tarafından işğal etilgen Novoalekseyevka qasabasından Qırımğa yol alğan edi. Rusiye büyük istilâsını başlamazdan evel çoq balalı baba taksici olaraq çalışqan. Cenk başlağan soñ qorantasını Bağçasaraydaki soylaprını alıp ketmege tırışqan, amma bunı yapamağan. Araba rusiye yoqlav keçitene kelir eken yolcular pasportlarını teşkerüv içün bergenler. Bundan soñ Rusiye FSB hadimleri Gugurikni yaqalağan.
Martnıñ 31-nde Rusiyeniñ nezaretinde olğan Aqmescit şeeriniñ Kiyev rayon mahkemesi Rustem Gugurikni «Noman Çelebicihan adına qırımtatar batalyonında» iştirak etüv qabaatı ile eki buçuq ayğa tevqif etkeni belli oldı.
Qayd etmek kerek ki, Rusiye FSBsi «Noman Çelebicihan qırımtatar göñülli batalyonına» Gugurik tutulğan soñ terror teşkilâtları cedveline kirsetti.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
