Californiyanın yanında Grand Princess kruiz laynerinde 21 adam koronavirusnen hastalandı. Bunı AQŞ vitse prezidenti Mike Pens haber etti. Hastalanğanlarnıñ arasında 19 yolcu ve eki taqım azası.
Eki yolcunıñ koronavirus hastalığı tapılğanında soñ, gemini karantinge qoydılar. Olardan birisi öldi. O 71 yaşında olğanı ve sağlığı zayıf olğanı belli oldı, haber ete Azatlıq Radiosı.
Grand Princess gemisinde umumen üç yarım bin adam bar. Olarnıñ arasında dört rusiye vatandaşı.
Grand Princess - karantinge qoyulğan ekinci kezüv gemisi. Fevralniñ başında Yaponiya yalısı yanında Diamond Princess gemisi toqtatılgan edi. Laynerniñ ekisi de bir şirketke ait. Diamond Princesste dört biñge yaqın adam bar edi. Umumen bu gemide 690-dan ziyade yoquma adisesi qayd etildi, olarnıñ arasında üç rusiyeli. Şimdi olar Qazan hastahanesine buluna. Diamond Princess gemisiniñ altı esli yolcusı elâk oldı.
Martnıñ 3-ünde Ukrainada ilk COVID-19 koronavirus hastası qayd etildi.
Yañı çeşit koronavirus yuqunçı 2019 senesi dekabr ayında Qıtayda tarqalıp başladı.
2019-nCov (COVID-19) virusı büyük koronaviruslar gruppasına aittir. Bazılarda hastalıq qolay keçe, bazılarınla suvuqlanuv ve gripp alâmetleri, em de yüksek sıcaq ve öksürik bar, ağır hastalarda nefes tarlığı qayd etile. Bu öldürici ola bilecek pnevmoniyağa keçe bile.
