İlhaq etilgen Qırım ükümetiniñ başı Yuriy Gotsanük, bu künge qadar olğan malümatqa köre, Qırımnıñ suv anbarlarında keçken yılğa köre 5 qat çoq suv toplanğanını bıldirdi. Bunı o, "Millet" telekanalınıñ yaynında ayttı.
"Bu künge qadar biz 35 million kub suv topladıq. 2020 senesi aynı vaqıtta episi olıp 6 million kub metr suv edi. Kölem 5 qat arttı", - dedi o.
Onıñ aytqanına köre, Qırımda quyular açılması da tamamlanmaqta.
"Aqmescit şeerine, Aqmescit ve Bağçasaray rayonlarına qoşma olaraq daa 15 biñ kub bermek niyetimdemiz", - dep qayd etti memur.
Gotsanük Qırımda aman-aman bütün suv meseleleleri çezilgenini iddia ete.
Qırımnıñ suv teminlevi
Ukraina, Qırımnıñ içecek suv ihtiyaclarınıñ 85%-ni yarımadanen bağlağan Dnipro aqıntı yolu olğan Şimaliy-Qırım kanalı vastasınen teminlegen edi. 2014 senesi Rusiye Qırımnı işğal etken soñ yarımadağa suv berilmesi toqtatıldı.
Qırımdaki suv yedekleri suv anbarları ve yerastı çoqraqlardan toldurıla. Ekologlarnıñ aytqanına köre, yerastı çoqraqlarnıñ muntazam sürette qullanılması yarımadada topraqnı tuzlattı. Qırım akimiyeti yarımada sakinlerini suvnı az qullanmağa çağıra.
2020 senesi Qırımdaki suv teminlevi vaziyeti kritik oldı. Qırımlı alimlerniñ bildirgenine köre, yağanaqlar yağmağanı içün ve qar az yağğan qış neticesinde qurğaqlıq oldı.
Avgustnıñ soñunda Aqmescitte, Aqmescit ve Bağçasaray rayonlarında suv berüv cedvelleri kirsetilgen edi. Daa soñra Qarasuvbazarda, Qarasuvbazar rayonında ve qısmen Aluştada cedveller kirsetildi.
Kreml kontrolindeki Qırım yolbaşçısı Sergey Aksenov Rusiye Qırımnıñ suv teminlevini fevqulâde vaziyet olaraq tanıması mümkün, dep ayta. O, 2020 senesi 150 yıl içinde eñ quru oldı, dep bildirdi.
Rusiye akimiyeti yañı suv boruları, suv qoralarınıñ quruluvına ve quyu qazıluvına milliardlarnen ruble ayırdı.
BM Ukraina Monitoring missiyası, halqara uquqqa köre, Rusiye Qırım ealisini suvnen temin etüvden mesüliyetli ola, dep israr ete.
Resmiy Kyiv, Şimaliy-Qırım kanalından suv yarımadağa tek Qırım işğalden qurtarılğan soñ berilecek, dep bildire.
