Google tercimanında qırımtatar tiline latin urufatında tercime etmek imkânı qoşuldı. Buña Qırımtatar Milliy Meclisiniñ reisi Refat Çubarov diqqat çekip, Facebookta haber etti.
«Google latin urufatında qırımtatar tiline tercime etip başlağanını epiñiz kördiñizmi? Şimdilik eki variantnı saylamağa imkân bar: kiril ve latin urufatını. Qullanıñız, özüñiz ögreniñiz ve Google tercimanını mükemmeleştirmege yardım etiñiz!», – dep yazdı Çubarov.
Daa evel qırımtatar tiline latin ariflerinen tercime tek satırlarara transliteratsiya qullanıp mümkün edi.
İyünniñ 27-nde Google, tercimanını büyük kenişletüv aqqında bildirdi: qırımtatar tilinen beraber 110 yañı til kirsetildi.
Daa 2020 senesi Ukrayinanıñ vaqrınca işğal etilgen topraqlarnıñ reintegratsiya işleri nazirligi Google LLC korporatsiyasına muracaat etip, qırımtatar tilini Google Translate servisine kirsetmege rica etken edi.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d3454ggyqnys2v.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
